NRK Meny
Normal

Illuda go leat čađahan buori válgga

Go leat lohkan 73,6 proseantta jienain, de orro nu ahte Norgga Sámiid Riikasearvi lea Norgga sámediggeválggaid vuoiti. NSR presideanttaevttohas dadjá ahte logut leat ain measta jáhkkemeahttumat, muhto son oaivvilda ahte sii leat dahkan buori válgga.

Aili Keskitalo maŋŋel válggaid

Norgga Sámiid Riikasearvi presideanttaevttohas, Aili Keskitalo, dadjá ahte sis lea dál nuoraidjoavku Sámedikkis ja sis lea dál vejolašvuohta oahppat.

Foto: Berit Nystad / NRK

– Min kandidáhttat leat bargan hui buori barggu, ikte leat muhtimat ollen veaháš ávvudit, muhto mun jáhkán buohkat dál illudit go mii galgat deaivvadit ja ovttas ávvudit dan buori barggu, dadjá Norgga Sámiid Riikasearvi (NSR) presideanttaevttohas, Aili Keskitalo.

Keskitalo jáhkká ahte sii leat ovdánan go sis lea leamaš rievttes sáhká, rievttes áigái.

– Mis leat leamaš olu sihke hárjánan ja ođđa kandidáhtat. Ja sáhtát vel dat ahte jienasteaddjit leat háliidan čájehit midjiide doarjaga, sii eai leat riekta liikon dan movt mii massiimet fámu juovlamánus. Ja de leat sii háliidan jienasteami bokte čájehit ahte lea luohttámuš midjiide, dadjá son.

Keskitalo muitala ahte ovtta gaska orui nu ahte máŋgasat ledje vajálduhttán dan mii geavai skábman, muhto go válggat lahkonišgohte, de orui nu ahte dat ii lean dušše dološ muitu.

– Máŋgasat háliidedje čájehit doarjaga midjiide jienasteami bokte, dadjá son.

Geaiguin áigu vuođđudit eanetlogu

Go jearrat geainna áigu vuođđudit eanetlogu, de vástida Keskitalo ahte lea lunddolaš gulahallat singuin geaguin sii leat ovdal ovttasbargan.

Eirik Larsen ja Aili Keskitalo

NSR stába bargi Eirik Larsen ja NSR presideanttaevttohas Aili Keskitalo áiguba riŋget buohkaide ja muitalit movt dilli lea ja movt sii ovddasguvlui áigot ráhkkanit.

Foto: Berit Nystad / NRK

– Ja go orro nu ahte muhtun listtuin leat lihkustuvvan nu bures, ahte leat ovddastuvvon Sámedikkis, de mii dieđusge singuin gulahallat. Ja sávvamis de lea sin bealis maiddái dáhttu ovttasbargat, muhto dan boahtá áigi čájehit. Dat lea nu ahte muhttin dáin loguin ja áirasiin eai leat vel 100 proseantta sihkkaris áirasat, nu ahte dat šaddá gelddolaš gullát movt manná go dárkkistit jienastanloguid, dadjá son.

Nuorain vejolaš oahppat dál

Norgga Sámiid Riikasearvi presideanttaevttohas, Aili Keskitalo lea hui rámis ja hui movttet go leat nagodan ožžodit nuoraid mielde politihkkii.

– Mis lea dál nuoraidjoavku Sámedikkis ja sis lea dál vejolašvuohta oahppat. Nominašuvdna dáhpáhuvvá báikkálaš dásis, ja mis leat sihke nuorat ja eanet hárjánan politihkkárat dál Sámedikkis. Dat mii bođii veahá fáhkka lei dieđusge dat go mii oaččuimet nu olu áirasiid Sámediggái, ja mis leat de várrá sámediggekandidáhtat geat eai lean vuordán beassat Sámediggái. Ja mun ferten beaivvi mielde riŋget buohkaide movt dilli lea ja movt mii ovddasguvlui galgat ráhkkanit, dadjala son.