Bearjadaga olbmot besse dánsut go festiválaprográmma lei lohpidan rytmihkalaš eahkeda. Solju-joavku álggahii konseartta ja bovttii olbmuid dánsunmovtta. Dan maŋŋel jotkkii Kevin Boine.
Ávvodovdu lei bohciidan ja festivála olbmuin lihkadišgođii dánsunjuolgi. Ja vurdojuvvon joavku, Kanadalaš Dj-kollektiiva Tribe Called Red lávkii lávdái, de gal olbmot beanta gieváskedje.
Joavku lei vuosttaš geardde Suomas ja festivála gallededdjiide lei dát ávvuboddu go viimmat besse vásihit sin.
Sin musihkas ovttastuvvet dánáigásaš hip hop, dološ pow wow -tradišuvdna ja maiddái elektrovnnalaš musihkkastiillat. Ja ii lean mihkkege ipmašiid, ahte atmosfeara maŋŋel konseartta lei hui fámolaš ja liekkas.
– In máhte jáhkkit dan, ahte sii leat dáppe, gullui muhtun lihkolaš fánsa girbmideamen.
Ođđa nuortasámi musihkka
Dán jagi festivála oktavuođas almmuhii skearru nuortasápmelaš joavku Suõmmkar, masa gullet Anna Lumikivi, Hanna-Maaria Kiprianoff, Marko Jouste, Pessi Jouste ja Ari Isotalo. Olbmot vuorddašedje ođđa nuortalaš musihkka stuorra beroštumiin ja Sajosa auditoria lei ge áibbas dievva.
– In livčče jáhkán, ahte olbmot háliidit jearrat mis nammačállosiid. Dat lei hávski, muitala Lumikivi.
– Lei áibbaš jáhkkemeahttun dovdu konsearttas.
Dievva doaimmat vahkkoloahpa
Vuosttaš háve go Ijahis Idja lágiduvvui, de dalle lei dat nu unni, dušše moatte-diibmosaš konsearta Anára boares girjeráju šiljus. Dál lea festivála sturron ja bistá olles vahkkoloahpa ja lea šaddan okta Sámi stuorámus musihkkadáhpáhusain.
Fálaldagas lea buohkaide juoga. Márkaniin ledje iešguđetlágan duojit, miehtá Sámi. Ja doppe ledje maiddái njoarostangilvvut, musihkkabargobajit ja -seminárat.
Festivála buvttadeaddji Oula Guttorm maiddai lávkii lávdái lávvordaga iežas Trio Boogiemen-joavkkuin. Sii čuojahedje ovttas Amociin ja Ailu Valliin.
– Lean duhtavaš dán jagi festiválii, muhto ii das vel beasa luomu váldit. Ferte gal plánegoahtit jo boahtte jagi festivála, dadjá Guttorm.
Lávvordateahkeda festiválaguossit besse gis návddašit elektrovnnalaš musihka ja Tundra Elektro álggahiige eahkeda. Lávddis ledje dieđusge maiddai ráppárat Ailu Valle ja Amoc ovttas Trio Boogiemen-joavkkuin. Bures lihkostuvvan festivála loahpahii Felgen Orkester, mii lea čuojahan Ijahis Ijas ovdalge.