NRK Meny
Normal

Ii vuoitán bálkkašumi

Sámi girječálliidsearvi árvalii Sigbjørn Skådena girjji Davvi riikkaid ráđi girjjálašvuođabálkkašupmái, muhto ii vuoitán

Sigbjørn Skåden
Foto: Daniel Raitio / NRK

"Skuovvadeddjjiid Gonagas" lea girji maid Sámi Girječálliid searvi lea nammadan Davvi rikkaidráđi 2007 girjjálašvuođabálkkašupmái. Girjji lea Sigbjørn Skåden čállán ja Sámi Girječálliid Searvi lei námmadan lávdegotti mas golmmas golmma riikkas oassálaste. Joavkkus ledje Rauna Paadar-Leivo, Nils Henrik Sikku ja Inga Ravna Eira.

Joavku árvvoštalai guhtta girjji, muhto juohkehaš lei gávnnahan ahte Sigbjørn Skåden girji lea dat buot buoremus. Danne nammaduvvui Skådena girjji Davvi Riikkaid ráđi gilvui.

Sigbjørn Skåden čállá diktahámis iežas suopmana mielde, mii lea Ofoahta ja Mátta Romssa guovlluin. Dát suopman lea máŋgga dáfus earalágan go davvisámegiella. Skåden geavaha erenoamáš sániid mat davvisápmelažžii leat váddásat áddet. Girjjis muitala son nuorra albmás, Jusup birra. Jusup máhccá Sápmái maŋŋil go leamaš olu jagiid máddelat guovlluin. Fuolkkit bohtet kájii váldit su vuostá. Son lei oahpásmuvvan niidii gean dál lea guođđán danne go kultuvrralaččat eaba doaibman ovttas. Sápmái dattege ii dovdda šat gullevašvuođa, ii oro šat heiveme gosage. Šaddá dego dolos juvddálaš, agálaččat mátkkis. Son oahpasmuvvá de muhtin espánjalažžii gii oahpaha Jusupa áddet iežas dilis, son áddegoahtá mo boahtteáigi šaddá. Loahpa loahpas báhtara Jusup áirrohis fatnasin. Biegga ja bárut dolvot su mátkái.

Skåden ii son čále dušše sámegiellii, muhtin sajiin čállá maid áibba eará gillii go sámegillii, ja sáhka ii leat dušše sámis. Son čállá maid eará guovlluin, nugo Gaskaábis, kristtalašvuođas, ráhkesvuođas, suttus, jápmimis ja nu ain.

Rauna Paadar-Leivo muitala alddiineaset lean guhtta girjji, ja dáin de loahpa loahpas válljejedje sii Skuovvadeaddjjiid gonagasa. Sámi girječálliid searvvis leige golmmaolbmo joavku mii árvvoštalai girjjiid, Ruoŧas Nils Henrik Sikku, Norggas Inga Ravna Eira ja Suomas Rauna Paadar Leivo. Paadar-Leivo muitala iežaset lean ovttaoaivilis dasa ahte nammadit Skåden girjji.

Njukčamánus mearrida Davvi Riikkaid ráđđi guhte girji de fitne bálkkašumi. Nie muitala Sámi Girječálliid searvvi Rauna Paadar-Leivo, muhto eai buohkat leat seamma oaivilis go Sámi girječállid searvvi joavku.

Fágagirječálli Harald O. Lindbach ii gal loga Sigbjørn Skåden girjji ánssášit Davvi Riikkaid ráđi bálkkašumi. Dán bálkkašupmái ii leat dát girji doarvái erenoamáš ii hámis, ii sisdoalus iige čállinvuogisge, oaivvilda Lindbach.

Gula jearahallama