- Dat lea nu unnán realisttalaš, muhto dieđusge dat lea álmmuhuvvon dan dihtii vai boktá digaštallama. Ja lea buorre go digaštallan ja buorre go olbmot dál veahá jurddašišgohtet makkár váikkuhusat leat dan suohkanreforpmas sámi guovlluide ja sámi suohkaniidda, lohká Keskitalo.
Stuorra sámi gielda
Romssa fylkkapolitihkkarat lea juo guorahallagoahtán ja árvališgoahtán makkár gielddaid sáhtašii ovttastahtti Romssa fylkkas ja Finnmárkkus.
Okta árvalusain leage ásahit stuorra gieldda mas časket oktii golbma stuorra sámi gieldda. Guovdageaidnu, Kárášjohka ja Porsáŋgu šattašedje de oktan gieldan ovttas muhtun Finnmárkku riddogielddaiguin.
Sámediggepresideanta Aili Keskitalo lohká gielddaidođasteami váikkuhit buohkaide ja ferte bidjat bargguid johtui, sihkkarastin dihtii ahte dákkár stuorra sámi gielda ii šaddá boađusin ođasteamis.
Gielddaidođasteapmi
Fylkkamánnit ožžot dál bargun láhčit dili nu ahte báikkálaš dásis bohtet johtui bargguin, mas buot gielddat árvvoštallet leatgo gielddarájit heivehuvvon boahtteáiggi hástalusaide. Maiddái gieldda suorggi organisašuvdna KS lea mielde dán barggus.
Geasset bovde stáhtaráđđi buot riikka gielddaid searvát bargui, mas čielggadit ja árvvoštallet oidnetgo vejolažžan ovttastahttojuvvot ránnjágielddaiguin. Ii leat vel čielggaduvvon mo dát čuohcá sámi gielddaide jus boahtteáiggis oktiičaskojuvvojit gielddaiguin mat eai leat sámegiela hálddašanguovllus.
Guldal ášši: