– Dakkár kvalitehtaduojit nugo gárit, náhpit, guvssit ja niibbit dat manašedje, ja maiddái olu boahkánat main silbaboalut ja eandaliige čoarvvis ráhkaduvvon boalut. Daidda lea nu stuorra jearru ahte mun in olle ollašuhttit buot maid jearahit.
Skuvlen nuoraid
Laiti muitala ahte earret eará bargohárjehallamiid ja bargosoahpamušaid bokte son lea skuvlen nuoraid, nugo iežas bártni guhte galgá joatkit áhčis barggu Samekki-bájis Anáris. Muhto sus lea gal vásáhus ahte eai leat nu olu duojárat geat duddjojit garradujiid.
Earret buori áiggi váldit ja bargat vuđolaš barggu, rávve Petteri Laiti nuoraid márkanfievrridit iežaset duoji.
– Don fertet gal máhttit márkanastit ja čájáhusain dahkat iežat nama dovddusin, dadjá Laiti. Son lasiha ahte ferte maiddái duostat rápmot ja muitalit dan duogáža das man čehpet sámit leat máhttán atnit ávkin árktalaš guovllu vátna ávdnasiid ja dain ráhkadit árvvu dujiid mat bistet ja seilot sohkabuolvvas nubbái ja main árvu dušše lassána mađi guhkit áigi gollá.
Turisttat ostet buot dujiid
Logi jagi dassái álggahii johttisámi bearaš turistafitnodaga Gilevutnii Finnmárkui ja turisttat galledit fitnodaga viššalit. Fitnodateaiggát Ellinor Guttorm Utsi muitala ahte fitnodagain manná bures, muhto .
Petteri Laiti Anáris ii jođit nu olu iežas dujiid turisttaide, muhto dan guvlui sus ii leamaš áigumušge bargat. Su bádji lea veaháš doaresbealde, ja dat heive sutnje bures.
– Dalle go álggahin doaimma, de Anára gielda geahččalii munnje fállat Suoločielgái hálla gos beasan duddjot. Lohken ahte mun in hálit dakkár báikái, go inhan mun astta duddjot go fitnet dat turisttat ájiheamen ja dáikkiheamen doppe, bohkosa Laiti.
