NRK Meny
Normal

Ii mearrasámiid vuoigatvuođaid hilgut

– Mearrasámiid vuoigatvuođat leat nu dehálačča munnje, ahte mun gal in doarjjo dakkár politihka mii dáid bivdovuoigatvuođaid hilgu. Nu dadjá Gáivuona ovddeš sátnejođiheaddji.

Ordfører i Kåfjord kommune Bjørn Inge Mo

Gáivuotnalaš, Bjørn Inge Mo, ii loga searvat listui man ulbmil lea hilgut ja caggat mearrasámiid histojjálaš bivdovuoigatvuođaid.

Foto: Ann-Irene Buljo / NRK

Maŋimus áiggi lea leamašan digaštallan mearrasámiid bivdovuoigatvuođaid birra, mii vuolggahuvvui das go Bargiidbellodaga ovddeš nubbijođiheaddji, Helga Pedersen, celkkii ahte Smith-lávdegotti NAČ ođđasit meannudeapmi gal ii leat šat áigeguovdil.

Helga Pedersen šiitá ahte dalá Bargiidbellodaga ráđđehus lea hilgon Smith-lávdegotti evttohusaid. Son dadjá guolásteapmi lea sámi kultuvrra ja ássamii dehálaš eaktu rittus, ja ahte sii danin láhkamearrádusa bakte leat sihkkarastán bivdovuoigatvuođaid buohkaide geat ásset mearrasámi guovlluin.

Ii dovdda cealkagiid

Helga Pedersen berre ođasmahttit dieđuidis Sámedikki guolástuspolitihka mearrádusain, ja buorebut go maid dán rádjai lea dahkan. Dan dajái Bargiidbellodaga Sámediggejoavkku dálá joavkojođiheaddji, Vibeke Larsen dá gieskat.

– Mun in leat gullan inge lohkan maid Helga Pedersen lea dadjan, ja danin mun in háliit inge sáhte dadjat maidege dasa. Dan dadjá Gáivuona suohkana ovddeš sátnejođiheaddji, Bjørn Inge Mo, ja dadjá alddis čielga vástádusaid mearrasámiid bivdovuoigatvuođaide.

Historjjálaš vuoigatvuođat

– Munnje leat mearrasámi bivdovuoigatvuođat nu dehálačča ahte mun in sáhte searvat listui main mihttomearri lea mearrasámiin rievidit historjjálaš bivdovuoigatvuođaid.

Dan dadjá Bjørn Inge Moi, ja lasiha maiddái ahte jus Sámediggi dál galgá jorgalit sealggi mearrasámiid bivdovuoigatvuođaide, de gal ii leat dárbu dakkár Sámediggái, iige sus lea dahkámuš dakkár Sámedikkis.

Eai čearddalaš vuoigatvuođaid

Bjørn Inge Mo ii loga doarjut vuoigatvuođaid čearddalašvuođa mielde. Son dadjá ahte Čáhputášši Olmmáivákkis lea buorre ovdamearka mo sáhttá vuoigatvuođaid juohkit olles guovllu álbmogii, iige dušše ovtta čerdii. Son muittuha ahte Čáhputguovllus han leat buohkain seammadássásaš vuoigatvuođat beroškeahttá leago sápmelaš, dáža, kvena vai mii.

Muhto mearrasámiid historjjálaš vuoigatvuođat riddoguovlluin, masa maiddái Smith-lávdegoddi čujuha, leat nu dehálačča ahte daid ferte Sámediggi earenoamážiid gozihit, dadjá Bjørn Inge Mo