NRK Meny
Normal

Ii liiko dadjat ahte son lea Finnmárkkus eret

Ellen Kristina Saba jearrá – ii go son leat áigi rievdadit Finnmárkku nama?

Ellen Kristina Saba

Olgešbellodaga sámediggeáirras Ellen Kristina Saba atná Finnmárkku nama unohassan.

Foto: Carl-Gøran Larsson / NRK

– Mu mielas ii leat nu somá muitalit ahte mun lean Finnmárkkus eret. Mun lean sápmelaš, ja mun dohkkehan dan ahte dárogillii lea Finnmark, ja mun de dan ieš jorgalan boastut sámegillii - Finnmárku.

Dan dadjá sámediggeáirras Ellen Kristina Saba (O), ja jearrá ahte ii go son gávdno sámegiel namma Finnmárkui.

Son bijai seamma gažaldaga gaskavahku Sámedikki dievasčoahkkimii.

– «Finn» unohas namma

– Finnmárku lea mu mielas hui unohas fylkkanamma dáppe davvin, danin go dasa badjánit olu váivves dovddut. Namalassii go das lea «finn» namahus, ja maiddái danin go márku han ii leat mihkkege sáme namaid, dat han lea eana.

«Finnjævel» ja «lappjævel» leamaš namahusat mat leat geavahuvvon sápmelaččaid cielahit, ja danin orruge sámediggeáirasa mielas áigi molsut Finnmárkku nama sámegillii.

Johan Vasara

Bargiidbellodaga sámediggeáirras Johan Vasara dadjá ahte Finnmárkku namas ii leat makkárge sisdoallu.

Foto: Carl-Gøran Larsson / NRK

Sus leat alddán evttohusat.

– Ovdamearkka dihtii Davvi, dahje Davveguovlu, dahje Davvi Sápmi.

Oaivvilda namas ii leat sisdoallu

Maiddái Johan Vasara (Bb) mielas lea Finnmárku boasttu namma.

– Finnmárku lea namma maid mii leat skuvllas oahppan, dat lea Finnmárku dát guovlu gos mii orrut, ja das ii leat rievtti mielde makkárge sisdoallu.

Sámediggeáirras árvala čuovvolit dan maid Suomas leat dahkan.

– Mii diehttit Suoma bealde lea dahkkon mearrádus oalle áigá, ahte dan Lappi nama jorgalan sámegillii Sápmi, ja mii diehttit iežamet vuorrasiin ahte dat hupmet sámi guovlluid birra go dáid guovlluid birra hupmet.

Dattetge lea sus čielga oaivil makkár namma galggašii.

– Mu mielas livčče lunddolaš ahte dat lea Sápmi dát guovlu gos mii orrut, ja dárogillii fas Finnmark.

Ii láve dadjat Finnmárku

Báikenamain lei ge sáhka Sámedikkis gaskavahku, ja okta dain gii oaivvilda ahte dál ferte čohkket daid ovdalgo lea menddo maŋŋit, lea Norgga Sámiid Riikasearvvi jođiheaddji Beaska Niillas.

Son ii láve dadjat ahte lea Finnmárkkus eret.

Beaska Niillas

NSR jođiheaddji Beaska Niillas ii láve dadjat ahte lea Finnmárkkus eret.

Foto: Carl-Gøran Larsson / NRK

– Mun lean ovdal smiehttan dien birra, ja mus gal lea iežan bealis veahá čielga politihkka, ahte go olbmot jerret gos don leat eret? Na mun logan davvi Sámis. Gos davvi Sámis? Na Deanus, dahje Norgga beal rájá, jus nu dárkilit dáhttot. Mun in gal ba geavat ge dien Finnmárkku.

Rievdadit Finnmárkku nama sámegillii lea juoidá masa son maid mieđašii, muhto justa masa son ii leat vuos mearridan.

– Dan gal ferte vehá suoskat, Norggabeale Davvi Sápmi livčče buorre árvalus, muhto dat han lea maiddái Tromssa fylka, nu ahte ii dan ge sáhtte.

Guovlluođasmahttin liiban

Saba ja Vasara oaidniba guovllu ođasmahttima maid ráđđehus lea álggahan buorre liiban gávdnat ođđa nama davvi sámi guvlui.

– De han soaitá Finnmárku, Romsa ja Nordlánda šaddat okta guovlu, dadjá Ellen Kristina Saba.