Doaivvuhisvuohta ja panihkka orru leamen duogážin ođđa bellodatásaheapmái

Maŋŋil go sámediggepresideanta Vibeke Larsen vuoittáhalai Bargiidbellodaga nominašuvdnačoahkkimis, de son dieđihii eret bellodagas, ja lea dál bargagoahtán ođđa bellodaga cegget. Dán jurdaga gal eai buohkat doarjjo.

Bjørn Inge Mo

Bjørn Inge Mo gal ii loga goassege vásihan bellodatspižá Bargiidbellodagas

Foto: Arbeiderpartiet

Bargiidbellodaga Sámepolitihkalaš ráđi jođiheaddji, Inga-Lill Sundset, ii ane vuogasin go Vibeke Larsen bidjá návccaid čoaggit namaid ođđa bellodaga ásaheapmái Tråante 100 jagi ávvudandoaluid oktavuođas.

Son lohká ballat Larsena nammačoaggima suoládit beroštumi ávvudeamis, ja sávvá ahte Vibeke Larsen baicce geavaha áiggi ja návccaid doaibmat sámediggepresideantan sámi álbmotbeaivvi 100 jagi ávvodoaluin Tråantes.

Panihkka ja doaivvuhisvuohta

Gáivuona ovddeš sátnejođiheaddji, Bjørn Inge Mo, dadjá ahte juohkehažžii lea friddja ásahit bellodaga, muhto áigi orru veaháš imaš.

‒ Vibeke Larsen lea dássážii leamašan miellahttun Bargiidbellodagas ja sámediggejoavkkus, muhto dál go nominašuvdnačoahkkimis ii ožžon luohttámuša presideantaevttohassan, de vállje bellodahkii jorgalit sealggi, dadjá Bjørn Inge Mo.

Guhká ságastallan sierra bellodaga birra

Mo muittuha ahte Bargiidbellodaga sámepolitihkalaš áirasiid gaskkas lea guhká leamašan sáhka ahte galge go ásahit sierra ja sorjjasmeahttun sámi sosiálademokráhtalaš bellodaga. Máŋggas leat čujuhan dasa ahte váldobellodat beare haga stivre.

Bjørn Inge Mo

Bjørn Inge Mo lei NSR miellahttu 1989 rádjai ja dieđihii das rájes miellahttun Bargiidbellodahkii.

Foto: Rolf Jakobsen / NRK

‒ Mun lean leamašan mielde bargiidbellodaga sámepolitihkalaš ossodagas 1989 rájes go mun luhpen NSR miellahttun.

Mun in gal goassege leat vásihan bellodatspižá dahje ahte váldobellodat lea gieldan mu ovddidit iežan oaiviliid sámepolitihkalaš áššiid birra, dadjá Bjørn Inge Mo.

Dat ahte mis leat čanastumit váldobellodahkii, dat lea midjiide leamašan givrodahkan, danin go mii leat dovdan ahte mii gullat seamma bellodahkii go dat mii lea stuorradikkis, dadjá Bjørn Inge Mo.

Doaivvuhisvuohta ja panihkka

Maid dajat dasa go Vibeke Larsen Tråante2017 doaluid oktavuođas lea čoaggigoahtán namaid ođđa bellodaga ásaheapmái.

‒ Dát čájeha ahte son doaivvuhisvuođa ja panihka dihte dál orru bidjan návccaid nammačoaggimii.

Mu mielas gal galggašii dáid dehálaš ávvodoaluid baicca ávvudit ja muittašit dan mii dáhpáhuvai 100 jagi áigi dan sadjái go bidjat návccaidis bellodatásaheapmái ja bellodatpolitihkalaš bargguide, dadjá Bjørn Inge Mo.

  • Guldal Bjørn Inga Mo vástádusaid dás.

NRK Ii leat lihkostuvvan oažžut Vibeke Larsen ságaide vai livččii beassan vástidit cuiggodemiid maid Inga-Lill Sundset, Bjørn Inge Mo ja Anders Urheim leat ovddidan.

Boastut geavahit ávvodoaluid ovtta riikka politihkkii

Anders Urheim, guhte lei Sámediggepolitihkar 2001-2009 rádjai, lohká leat boastut geavahit Tråante2017 doaluid ovtta riikka dahje guovllu politihka čalmmustahttit. Doaluid galgat baicca geavahit čalmmustahttit sámi álbmoga oktiigullevašvuođa, dadjá Urheim.

Anders Urheim

Lea boastut geavahit Tråante ávvodoaluid ovddidit ovtta riikka politihka, dadjá Bargiidbellodaga ovddeš sámediggeáirras, Anders Urheim.

Foto: NRK

Urheim geassádii Bargiidbellodagas 2007, ja ovddastii Sámi Sosiálademokráhtalaš Bellodaga guokte maŋimus jagi Sámedikkis. Son dadjá buorren go dán jurdaga fas dál čuovvolit.

– Dattetge lea jienasteaddjái váttis ipmirdit ja earuhit mat leat ideologalaš erohusat ja mat leat persovdnariiddut dán áššis, dadjá Anders Urheim.

Leatgo don dasto gearggus fas searvat sámepolitihkkii ja sámedikkebargui jus dakkár jearaldat ovddiduvvo, mun jearralin sus.

De gal Urheim bohkosa ja dadjala ahte ii leat gal vel oktage jearran.

Jus su vástádusa galgá dulkot, de son gal ii oalát biehttal jus juo jearaldat ovddiduvvo.