NRK Meny
Normal

Ii gierddašii šat ođđa dikki goddináššis

GUATEMALA: Riikka doaktárat gávnnahan ahte ovddeš diktáhtor, generála Efrain Rios Montt, ii leat dan mađe mielaid alde ahte gierddašii ođđa diggeášši vearredaguidis ovddas.

Efrain Rios Montt

Guatemala ovddeš diktáhtor Efrain Rios Montt navdojuvvo leat gottihan máŋga duhát maya-olbmo.

Foto: Luis Soto / Ap

Guatemala ovddeš generála stivrii oanehis áiggi riikka 1980-logus ja navdojuvvo leat gottihan 2000 maya-olbmo.

Doaktáriid árvvoštallan váikkuha guovtti diggeáššái, main Rios Montt lea áššáskuhttojuvvon bidjan geaskku goddit čuđiid mielde eanadoallodálolaččaid ja badjel 1000 ixil-mayaid.

Generála Rios Montt gávnnahuvvui sivalažžan álbmotgoddimis ja soahterihkkosiin guokte jagi dás ovdal, ja dubmehalai oktiibuot 80 jagi giddagassii.

Alimusriekti lea gomihan duomu

Ovddeš diktáhtor ja su dalá militeara vákšunhoavda leigga áššáškuhttojuvvon go leigga gohččon soahteveaga álbmogassii goddit (dahjege massakreret) 15 ixilmaya čeardda báikegotti Quiche guovllus Davvi-Guatemalas. Dáin fallehemiin gottii soahteveahka badjel 1700 olbmo.

Guatemala alimusriekti gomihii almmage duomu áššemeannudeami geažil ja gohčui ođđa dikki doallat.

Dán jagi ođđajagemánus álggii diggi Rios Montt vuostá, muhto bissehuvvui danne go dikki doapmár lei almmolaččat albmanahttán oaiviliid álbmotgoddima birra studeantabargobihtás.

Ođđa diggi galggai álgit dál suoidnemánus. Dás ii dáidde boahtit mihkkege dasgo doaktáriid raportta mielde lea Guatemala ovddeš stáhtaoaivámuš mielalaččat gealbboheapme.