NRK Meny
Normal

Ii fitnen buvttadandoarjaga

Otne álga guoddalanášši Hålogalandda lágamánnerievttis mas boazodoalli lea váidán boazodoallohálddahusa go ii leat ožžon buvttadandoarjaga guovtti jahkái.

Reinflokk i Finnmark

Čájáhusgovva. Govva ii gula diggeáššái.

Foto: Eilif Aslaksen / NRK

Son ii ožžon buvtttadandoarjaga go sus ledje menddo ollu bohccot, čájehuvvui boazolohkamis. – Hálidit gažadit ahte leago riekta dat ahte boazodoalli ii oaččo vejolašvuođa njuovvat bohccuid vuoi olaha buvttadandoarjaga, lohká boazodoalli ádvokahtta Geir Haugen.

Ollu massán

Buvttadandoarjja maid boazodoalli lea massán go ledje eambbo go 600 bohcco, ii leat smavva ruhta. Son lea massán 260.000 kruvnnu dan guovtti jagis go ii ožžon buvttadandoarjaga.

Njukčamánu 15. beaivve lea áigemearri goassažii galgá leat njuovvan, muhto boazodoalli ii ožžon 2005 boazolohkamis bohtosa ovdal njukčamánu loahpas. –Son oaivvilda ahte sus ii lean vejolašvuohta njuovvat dan mađe ahte livčče fitnet buvttadandoarjaga, lohká ádvoktahta Geir Haugen.

Vuollil 600 bohcco

Geir Haugen lohká gal leat nu ahte ollu boazodoalliin leat justta vuollil 600 bohccu vuoi olahit buvttadandoarjaga, ja nu čuvvot ealáhusas boazologu, muhto justta dien dálvve mas dás lea sáhka, lei erenoamáš jahki manne dán boazodoallis ledje beare ollu bohccut.

– Dat lei dakkár jahki goas ribahedje mastadit ealuid, danne lei ollu bargu ja váttis njuovvat nu ahte boazolohku lei vuollil 600, deattuha ádvokahtta Geir Haugen, ja dan son áigu rievttis otne čilget.

Eai loga nu ollu

Eanandoallodepartemeantta ádvokahtta Adele Matheson lohká ahte stáhta doalaha ahte boazodoallis ledje eambbo go 600 bohcco, ja muđui eai dáhto eanandoallodepartementtas kommenteret ášši.

Diggeášši álgá maŋŋebargga Kárášjogas ja bisttá guokte beaivve.