Finnmárkkuopmodaga (FeFo) stivra berre hilgut jeagge- ja njuoskaeatnamiid suodjalanplána maid Finnmárkku fylkkamánni lea sádden dál gulaskuddamii. Ná oaivvilda FeFo direktevra Jon Meløy.
– Sii váldet juo vára dan luonddus, mii Finnmárkkus lea nu, ahte ii leat dárbu gáhttet eanet, Meløy dadjá.
GULDAL:
Finnmárkku fylkkamánni árvalan gáhttenplána lea dál gulaskuddamis. Oktiibuot 23 ođđa guovllu Finnmárkkus galget ráfáidahttot. Dáid FeFo hálddašan guovlluid viidodat lea oktiibuot lagabui 794 njealjedaskilomehtera.
Jus Birasgáhttendepartemeanta dattetge mearrida árvaluvvon suodjalanplána, de FeFo direktevrra Jon Meløy ávžžuha váldit ain juo Ráitevári Kárášjogas eret dán plánas.
– Doppe leat ollu minerálat maid boahtte áiggis sáhtášii roggat, Meløy čilge.
FeFo stivrra meannuda dán ášši otne Kárášjogas. Gáhttenplána gulaskuddanáigi lea suoidnemánu 7. beaivve rádjai.