NRK Meny

Ii berre dohkkehit bivdosoahpamuša

Stuorradiggi ii berre dohkkehit Deanu bivdosoahpamuša maid Suoma ja Norgga ráđđehusat leat vuolláičállán. Dan oaivvildit Bargiidbellodaga, Guovddášbellodaga ja Sosialisttalaš Gurutbellodaga áirasat, namma lassii Kåre Simensen, Marit Arnstad ja Torgeir Knag Fylkesnes. Sii evttohit Stuorradikki sáddet ášši ruovttoluotta, ja álggahit ođđa šiehtadallamiid Suomain. Dahje cealkit eret dálá soahpamuša. Sin mielas ii leat govttolaš gáržžidit guovllu olbmuid árbevirolaš bivddu, seammás go Suoma bartaeaiggádat geat eai ása guovllus, ožžot ođđa bivdovuoigatvuođaid.