Nu boahtá ovdan preassadieđus maid Eanandoallodirektoráhtta lea odne sádden.
– Šiehtadusas daddjo ahte Jovsset Ante Sara galgá geahpedit ealu 75 heggii, mii lea dat gáibádus maid Boazodoallostivra ovdal lea buktán, lohká Eanandoallodirektoráhta boazodoalloossodaga direktevra Liv Berit Hætta NRK:i.
Son ii dáhto eambbo dadjat soahpamuša birra ja dadjá ahte dát lea priváhta soahpamuš boazodolliid gaskkas.
Bákkus ferten šiehtadit
Jovsset Ante Sara advokáhtta Trond Biti dadjá ahte dát šiehtadus daid eará boazodolliiguin lea dahkkon bákkuin.
– Duogážin dása lea ahte Jovsset Ante livččii sáhttán oalle stuora velggiid sisa šaddat jus stáhta livččii čađahan bággonjuovvama. Son fertii dahkat juoidá vai ii gártta dán dillái, lohká Biti.
Jovsset Ante doalaha 75 heakka. Mot daid eará bohccuiguin mat sutnje gullet, maid daiguin áigu dahkat?
– Dat merke dáid bohccuid lagas olbmui, ja de ferte Jovsset Ante dán boazodoallojagi mielde árvvoštallat vejolašvuođaid ja ferte boahtte giđa mielde oaidnit makkár dilis lea dalle, lohká Biti.
Ohcame eará vejolašvuođaid
Ferte go son guođđit Fálá orohaga?
– Dan ferte áigi čájehit. Juste nu mot dál lea, de lea veadjemeahttun bargat dainna boazologuin mii sutnje lea biddjon dál. Sus lea ain ášši ON olmmošvuoigatvuođakomiteas, ja lea maid geahččamin eará vejolašvuođaid. Lea ain eahpečielggas gos bargá bohccuiguin boahtte áiggis.
Fálá orohaga ovdaolmmoš Aslak Ante Sara ii leat vuos kommenteren ášši.
Doarjjamarkeren
Beaska Niillas lea dál Fálesnuoris. Ihttin galge leat akšuvnnat bággonjuovvamiid vuostá. Dál eai šatta dat, baicce doarjjačájeheapmi Jovsset Ánte Sarai, dadjá Beaska.
– Soahpamuš stáhta ja Jovsset Ánte Sara gaskka lea dušše gaskaboddosaš čoavddus, dadjá NSR stivralahttu Beaska Niillas. Danne bissot sii Fálesnuoris gos ihttin beaivit šaddá doarjjamarkeren.