Åse Ryan lea riegádan ja bajásšaddan Láhkovuonbađas, muhto oasi, 20 jagi, ollesolbmoagis lea son leamaš Kárášjogas gos su isit Paul Ryan barggai rektorin Sámi Álbmot Allaskuvllas.
Tekstildáiddár bálkkašuvvan
Son lea tekstiiladáiddár, lea ráhkadan olu govaid sihke applikašuvnnaid ja lea maid stovllaiguin gođđán olu seaidneteahpáid. Erenoamáš govat leat gárvánan su gieđaid gaskkas. Ja mannan giđa oaččui son bálkkášumi dáiddabargguidis ovddas Finnárkku fylkkagielddas.
Girjjážis govat su dáidagiin
Dál lea su dáidágiin ráhkaduvvon girjjáš, mas lea vejolaš oaidnit su dáidagiin. Lea Svanvik Álbmot Allaskuvlla Svein Sørensen gii lea ráhkadan girjji Åse Ryana dáidagiin.
Mo čáppisvuođa fitnet ovdan
So muitala iežas guhká imaštallan mo son sáhtašii muitalit dahje govvet luonddu čábbodaga. Máŋgii son čállilii maid son oaidna, muhto ii son máhttán málet govaid iige máhttán sárgutge govaid.
Čuohpadišgođii liinniin govaid
Go son ii máhttán málet govaid, iige máhttán tevdnet, de čuohpadišgođii son liinniin motiivvaid ja goaruid daid gieđain stuorát liidnái. Ná son ráhkadišgođii aplikašuvnnaid. Su vuosttaš aplikašuvdna lea gieđan gorron ja dáinna son beasai dáiddačájáhussii.