– Dát mearkkaša munnje hui olu ja dat ligge álo mu váimmu go oainnán ná olu olbmuid. Hirbmat somá oaidnit oahppásiid. Erenoamážit go mun ieš in šat oro Kárášjogas, de lea suohtas boahtit deike ja deaivat oahppásiid, lohká Iešjoht searvvi jođiheaddji Lill-Eli Jørgen-Dahl.
Son ja su bearaš ásset Álttás, muhto sus lea gullevašvuohta Iešjohleahkái ja Jergulii.
– Dán searvvis mis lea hirbmat buorre ovttasbargu. Mii bargat bures ovttas buot doaluiguin nu mo otná Jergul-stohkosiiguin, čilge Jørgen-Dahl.
Cathrin Mortensen lea okta dain gii geahččalii njoarosteami. Son orui birgemin bures, go dás son darvehii soahpana čoarvái.
Foto: Dan Robert Larsen / NRKJuoigalas biras
Iešjoht joavku lea dat spábbačiekčanjoavku mii eanemus gerddiid lea vuoitán Sámi Cup. Sii vuite dán iežas namain ja Nordlys namain moanaid heave 1980- ja 90-vuođđalogus.
Dieid áiggiid lei stuorra beroštupmi Sámi Cupii sihke Norgga ja Ruoŧa bealde.
50-jagi ávvudeapmi dollo idjadan- ja boradanbáikkis Jergul Asttus. Doalut leat sihke siste, johkagáttis ja joga alde.
iešjohleahkilaččaid dovdomearka lea, ahte eatnašat sis leat juoigalasat. Dan oatnelanbottus go NRK Sámi journalista lei Jergulis gullostii okta nubbi rohtteheamen luđiid.
Berit Alette Mienna.
Foto: Dan Robert Larsen / NRKOkta sis lea Berit Alette Mienna, geasa luohti lea šaddan eallinláibin. Beaivválaččat son ássá Romssa gávpogis ja son dovdá maid duogáža dasa go Iešjoht searvi ásahuvvui.
– Searvi ásahuvvui dan oktavuođas go huksegohte geainnu Kárášjogas Guovdageidnui. Álgoplánaid mielde galggai dás Jergulis johkagátte mannat dat geaidnu, muhto báikkiolbmot eai lean dasa nu mielas ja die leige álgu Iešjoht searvái, muitala Mienna. Dán ášši sii vuite.
Namma Iešjoht searvi lea easkka maŋŋá boahtán, muhto vuođđun searvvi doibmii lei várjalit guovllu sisabahkkemiid vuostá.
– Nubbi guovddášášši dalle lei oččodit sierra sarvvabivdoguovllu olbmuide geat ásset dáppe Jergulis. Dasa almmatge ii miehtan Finnmárkku fylkkamánni, muitala Berit Alette Mienna.
Arne Norvang ja su eamit Astrid ássaba Biris Opplandda fylkkas, muhto soai boahtiba juohke beassážiid Arne mánnávuođaguvlui. Bálddas čohkká sutno mánáidmánná Karsten Gabrielsen Norvang. – Mii gal loaktit dáppe hirbmat bures, lohká Arne Norvang.
Foto: Dan Robert Larsen / NRKOlu doaimmat
Jergul-stohkosiin eai leat ođđaáigásaš «fancy» fálaldagat, muhto dakkár doaimmat maid lea álki lágidit ja mat doibmet bures.
Doaimmat leat dákkárat: čuoigangilvu, gámabálkun, njealjis sabeha alde, áibmobissobáhčin ja njoarosteapmi. Dasa lassin dollo juoigankursa, njoarostankursa ja dolastallankursa!
– Dán jagi livččii mis galgan vel leat heargevuodjin, muhto das ii šaddan mihkkige buozalmasvuođa geažil, šálloša Lill-Eli Jørgen-Dahl.
Jergul Asttu lea čáppa guovllus Iešjohtgáttis. Otná ávvudeamis sáhttet olbmot ieža dolastallat ja dollagáttis reahttadit dahje oastit borramuša kafejás.
Foto: Dan Robert Larsen / NRK– Dá lea searvi mii čohkke olbmuid. Go dát searvi lea, de lea álkit bargat ja lágidit iešguđet doaluid. Deaivvadeapmi ja dat ahte bargat ovttas lea dávjá deháleappot go dušše doalut, muitala Berit Alette Mienna.
