Hofsø ådå girjijn – Arvusmahteduvvam mæssos namádimijda
Girjjetjálle Ellen Hofsø Bådådjos la ájggeguovddelis lågenanvuostasj románajn. Prosæssa girjijn «Messe for navnløse» (sámegiellaj «Mæsso namádimijda») álgij gå avijssaartihkkalav lågåj mæsso birra girkkogárden Inndyran Gildeskålan jagen 2005:n, da namádis ulmutjijda gudi li hávddáduvvam Lapphollan 1800-lågo álgon.
Romádna l bihtámsáme histåvrå birra, ja Hofsø adná sáme almmudagáv gånnå oasse berustimes la doajvvo sámegiellaj galggá jårggåluvvat.
– Ja de la gatjálvis makkár sámegiellaj de galggá. Ælla gal nav moattes Vuonan gudi bihtámsámegielav máhtti. Gallegattja, valla ienep Svierigin.
Hofsøa mielas gávnnuji moadda buorre subttsasa suv girjen, ja guorras aj filmmadåjmadiddjáj Nils Gaup guhti javlaj man ájnas la Nuortta-Vuonas subttsasijt subtsastit.
– Gájkka vájkkut vaj ulmutja ienebuv diehti, ja dákkir máhtodisvuodajn viertti gæhttjalit juojddá dahkat.
Ja Hofsø la juo ådå románajn barggamin. Girjen åvddånboahtá Hofsøa mielastuhttem luonndomystihkkaj, giehtoj tjadá sámij lahkavuoda birra luonnduj.
– Galgav tjállet gåktu sámijn lij 1700-lågon, ja de boahtá Thomas von Westen Nuortta-Vuodnaj ietjas misjonerimijn. Ja de oadtju muhtem láhkáj vas vásedit dav majt Svierigis jåhtin, valla boahtte buolvva l dat.
Ja sån galggá tjuovvot dálásjájge ulmutjijt vijdábut.
- Ja danna li dal moadda hásstalusá sidjij gudi dálla boahttsujn barggi.
Gulldala ienebuv Hofsøa ådå girje birra dánna.
