Hilgo ealáhusdáhkádusa go skuter vuojui johkii

Guovdageainnu boazosápmelaš reagerii go Storebrand dáhkádusfitnodat ii áigon máksit sutnje dáhkádusa billahuvvan skutera ovddas, vaikko su dieđuiguin son lei dáhkidan skutera ealáhusdáhkádusain.

– Ii aht dat goit leat riekta veaháš ge.

Nu dadjá Guovdageainnu boazosápmelaš Mihkkal Niillas Oskal.

Son lei dáhkidan iežas ođđa Lynx-skutera Storebrand fitnodahkii dan namas ahte son atná skutera boazobargguid oktavuođas.

Ealáhusdáhkádus gokčá skutera vaikko lihkohisvuohta dáhpáhuvvá doaresbealde almmolaš máđija.

Danne lei Oskalis nanu jáhkku dáhkádusfitnodaga máksit buhtadusa sutnje, muhto Storebrand:as hilgo.

Jorggihedje maŋŋel go mediat válde oktavuođa

Maŋŋel go mediat válde oktavuođa Storebrand dáhkádusfitnodagain, de leat sii jorggihan áššis ja lohpidit buhtadit Oskala skutera.

– Mii leat dađi bahábut verrošan dán áššis. Dat lea riekta ahte min priváhtadáhkádus ii govčča dákkár bárti, ja hilgojupmi lei riekta min dáhkáduseavttuid ektui.

Nu čállá Storebrand preassa ovddasvástideaddji Synnøve Hjelle Halkjelsvik NRK:i e-poasta bokte.

Son čilge ahte Storebrand ii dáhkit skuteriid mat adnojuvvojit ealáhusain.

– Kunddar, mii álggu rájes lea leamaš priváhtakunddar mis, lea vearu áššemeannudeami bokte beassan sirdit priváhta dáhkádusa iežas fitnodahkii, ja danin lea ožžon dáhkádusa mii ii govčča su dárbbuid.

– Mii šállošit dán ja áigut meannudit su ášši ođđasit ja dohkkehit su dárbbu, čállá Halkjelsvik.

• Loga: Dálkkádatrievdan sáhttá rievdadit boazodoalu

Skutersabet čálistii ja čuoggasii gálja jieŋas

Skábmamánu 18. beaivve vuoddjái Oskal iežas skuteriin ealo luhtte bartii. Sus lei olmmái maid fárus, muhto rasttildeames Kárášjoga, Guhkesluobbalis, láhka Anárjoga álbmotmeahci, de ii mannan nu go galggai.

Dat lei bihkka seavdnjat ja gálja.

– Nubbi sabet fáhkkestaga čálistii ja čuoggasii. Dakka maŋŋel šleaŋggehii skuter doarrás. Ieš ges bálkestuvvon eret skuteris ja čierastin sullii golbma mehtera jieŋa mielde, muitala Oskal.

Skuter vuojui jieŋa vuollái.

Mihkkal Niillasa olmmái gii lei ovdalis rasttildan joga vuojestii skuteriin gáttebeale su guvlui nu ahte čuvgii su guvlui.

– De mun gal guottáhallen olbmá lusa.

Oskal čilge ahte son lei gárvodan bures, iige bávččagan namuhan veara.

– Niski dat lea veaháš bávččas leamaš, muđui gal manai bures.

Moarsi čálistii dieđu Facebookii

– Mun čuojahin máŋgii Storebrand:i ja gulahallen singuin e-poasta bokte. Doppe dieđihedje ahte sii leat hilgon dáhkádus-ášši. Nu ahte mun gal ledjen vuolláneamen dáinna áššiin, dadjá son.

Muhto Oskala moarsi ii vuollanan ja čálistii dieđu Facebookii.

Ja go mediat válde oktavuođa Storebrand dáhkádusfitnodagain, de rievddai ášši.

– Mun dat gal ieš livččen vuollanan, muhto go moarsi čálii Facebookii, de čuojahišgohte mediat munnje, dadjá son.

Storebrand dáhkádusfitnodat lea čuojahan Oskalii ja dieđihan sutnje ahte son oažžu dáhkádusa billahuvvan skutera ovddas.

Loahpas rávve earáid vel.

– Gánnáha iskat maid dáhkádus gokčá vai ná ii dárbbaš bártidit, loahpaha Oskal.

• Loga: Gudnejahttá Keiino tatoveremiin: – Sii movttiidahtte mu doarrut dávdda vuostá
• Loga maiddái: Beatnagat boldon ja báhččon

NRK Sápmi lea rievdadan artihkkala sotnabeaivvi diibmu 17.00 maŋŋel go Storebrand dáhkádusfitnodat válddi oktavuođa ja čielggadii osiid mat ledje eahpečielgasat.