NRK Meny
Normal

Eai beassan finálii – muhto vejolašvuohta medálja fasket

Norway Cup spábbačiekči: – Lei oalle suivat vuoittáhallat, mii leimmet buohkat behtohallan.

HIF/Stein gánddaidjoavku

HIF/STEIN GÁNDDAIDJOAVKU: Gurut rávddas duogábealde: Jonas Martinsen, Marcus Pedersen, Elias Bjørgve, Michael Santana, Preben Engen Amundsen, Asi Ivarsson. Gurut rávddas ovddabealde: Ande Biti Næss, Alexander Svendsen, Trygve Giæver ja Torkel Langvoll.

Foto: Åse Næss

Kárášjotgánddas lei vejolašvuohta beassat gitta finálii go čievččai Hámmárfeasta joavkku mielde.

Dušše ovtta vel joavkku dárbbašedje časkit.

Muhto nu ii dáhpáhuvvan. Ain leat vejolašvuođat, muhto medálja ii sáhtte šat šaddat seamma šearrat mo gánddaid báidi.

Šlundi

HIF/Stein gánddaidjoavku vuitohalle semifinálas A-loahppačiekčamiin Norway cupas bearjadat iđit. HIF/Stein vuitohalai 4-2 Rosendal/Uksendal 2 joavkku vuostá.

Ande Biti Næss lea čiekčamin HIF/Stein ovddas Norway Cupas. Son muitala ahte sis lea mannan oalle bures muhto ahte otne vuoittáhalle vuosttaš geardde. Næss muitala ahte joavku lei šlundi maŋŋá go eai birgen semifinálas.

Semifinála galggai čikčojuvvot duorastat eahket, muhto heajus dálkkiid geažil sirdojuvvui kámpa otnážii.

HIF/STEIN GUTTELAG

HIF/Stein gánddat galget bearjadaga tiibmu 13.45 čiekčat bronsafinála.

Foto: Jonny Kristensen

Guossečiekči HIF/Steinas

Otne 13.45 galget sii Bronsafinála čiekčat Orion Sporting vuostá. Næss doaivu ja jáhkká ahte sii vuitet bronsačiekčamiid:

– Mun jáhkán ahte mii vuoitit bronsafinála, dat lea muhtin egyptalaš joavkku vuostá, dadjá Næss.

Ánde lea muđui duhtavaš Norway Cuppain, ja lea ilus go beasai leat guossečiekči HIF/Steinas:

Dat lea leamaš somá leat guossečiekči, dát lea buorre joavku mas buori čiekčit, ja mis lea leamaš hui buorre speallu.

Ánde Biti Næss

Hárjehalli duhtavaš

HIF/STEIN gutta tar pause

Gánddat vuoiŋŋasteamen maŋŋá garra kámppaid.

Foto: Åse Næss

Hárjehalli Jarle Bjørgve muitala ahte gánddat leat čiekčan hirbmat bures, erenomážit joavkočiekčamiin. Son dadjá ahte otná semifinála kámpa leat heajumus kámpa maid lea čiekčan Norway Cupas.

– Mis lei spábba olu ja mis ledje máŋga vejolašvuođa bidjat mollii, muhto eat nagodan, ja dan nagodii nubbi joavku dahkat. Lea veahá váivi, go mii ieža dovddaimet ahte dát lei joavku man vuostá livččiimet galgat vuoitit, dadjá Bjørgve.

– Muhto ii sáhte leat duhtameahttun go beasaimet bronsafinálii, dat maid lea buorre, lohká hárjehalli.

Bjørgve muitala ahte okta diŋga lea čielggas:

– Bronsafinála mii gal áigot vuoitit!