FINAI GUOSSIS: Finnmárkku Bargiidbellodaga stuoradiggeáirras Helga Pedersen finadii gieskat Guovdageainnus, gos galledasttii Beaivváš-teahtera visttii. Boahtte jagáš sámediggeválggaide lea maid Nuortaguovllu válgabiire vuosttaševttohas iežas bellodaga ovddas.
Foto: Mette Ballovara / NRK– Go Rolf Degerlund rabai teahtersále uvssa, de lei Helga Pedersen dadjan «dáppe han lea návethádja». Ja Pedersen gal juo diehtá makkár hádja dat lea, go sus han lea alddes návet.
Nu muitala Beaivváš-neavttár Mary Sarre, ja boagusta veaháš.
Son hállá Helga Pedersena teahtergalledeami birra.
Teahterhoavda Rolf Degerlunda mielas lea Pedersen ádden man vearrái dilli lea teahtervisttis.
- Guovllas govvaovdamearkkaid dás vuollelis:
Ii nu movttidahttii galledeapmi
ÁIGÁ EDDON: Beaivváža teahterhoavda Rolf Degerlund dat «ofelasttii» Helga Pedersen teahtervisttis Guovdageainnus gieskat.
Foto: Beaivváš Sámi Našunálateáhtera / PreassagovvaNRK deaivvada Helga Pederseniin Norsk kritikerlag:a bálkkašandoaluin Oslos, gos Beaivváš gieskat gudnijahttojuvvui bálkkašumiin.
Ja go NRK gulaskuddá Pederseniin dáid návet-cealkámušaid, de čilge:
– Mu galledeapmi ii lean gal dien dáfus nu movttiidahtii. Beaivváš-teahtera bargiid bargodilli lea hui heitot. Ja liikkáge nagodit sii buvttadit teahtera hui alla dáiddalaš dásis, ja sii han gudnijahttojuvvojit velá bálkkašumiin dál.
– Ja gal dat juo lea áigi ahte guovddášeiseválddit farggamusat ordnejit ođđa teahtervistti Beaivvážii, dajai Pedersen dalle.
VÁIVVÁŠUVVOJIT KUOHCAGAN TEAHTERVISTTIS: Dá Beaivváža neavttárat «Ridnoaivi ja nieguidoaidni»-bihtá čájáhusa oktavuođas.
Foto: Beaivváš Sámi TeáhterHáliida bágget ráđđehusa
Maŋŋá lea NRK sádden čálalaš jearaldaga Helga Pedersenii, dáinna jearaldagain:
– Don han leat ieš vuosttaševttohas boahtte jagáš sámediggeválggaide. Maid ieš áiggut bargat buoridandihtii Beaivváža visttedili?
– Jos Norgga ráđđehus ii vuorut Beaivváža boahtte jagáš stádabušeahtas, de ferte Stuorradiggi njulgestaga geatnegahttit ráđđehusa dan dahkat, fástida Pedersen, ja joatká:
– Stuorradiggi ja ráđđehus ferteba mieđihit ahte dán guovtte ásahusas lea ovddasfástádus Beaivváža hárrái. Eaba sáhte ekonomalaš ovddasfástádusa cealkit eret suohkanii, fylkkasuohkanii dahje Sámediggái. Buot dát golbma ásahusa han leat vásihan ahte bušeahttat unniduvvojit.
– Stáhta ferte leat mielde ruhtadit. Dát galggašii čovdojuvvot boahtte jagi mielde, ja dan ovddas áiggun stuorradiggeáirrasin bargat, lasiha Pedersen.
