Heittii oahpaheaddjin – dál álgá komihkkárin «Nytt på Nytt»-prográmmii

Les saken på norsk.

– Dovden ahte oahpaheaddjin bargat šattai hui lossat, ja ledje olu vuordámušat. De jerren alddán, maid mun rievtti mielde háliidivččen bargat?. Na humoriin dieđusge, muitala Kolpus.

– Mo dustet oalát guođđit iežat oahpaheaddjebarggu?

– Mun soaittán leat veaháš jalla ja várra jáhkkil, boagusta Kolpus.

Son lea ovdal bargan sámegiel oahpaheaddjin ja dadjá ahte diet bargu lea álo olámuttus.

– Jus dárbbašan barggu, de lea dušše riŋget muhtin skuvlii Norggas ja jearrat váilu go sis sámegiel oahpaheaddji. Dien dáfus in bala barggu haga šaddat boahtteáiggis, čilge son.

Rivttes báikkis rivttes áigái

Movt lea Isalill ná oanehis áiggis olahan ná guhkás? Dán gažaldaga jearai NRK sus.

– Olles mu karrieara lea lihku duohkin leamaš. Mun lean deaivan leat doppe gos vejolašvuođat leat leamaš.

Isalill lea ovdal bargan NRK Sámis ja evttohii gieskat ráiddu, masa son galggai oažžut veahki NRK Underholdningas ovddidit.

Ráiddus ii šaddan mihkkege, muhto Isalill oaččui golmma-mánnosaš barggu teakstačállin guoimmuhanprográmmas «Nytt på Nytt».

– Lea dakkár dovdu ahte mus lea leamaš beanta njuolggobálggis, go mun dieđán doppe leat ollu eará komihkkárat, geat maid livčče háliidan dán barggu, muitala Kolpus.

– Buoremus ja vearrámus mii munnje sáhttá dáhpáhuvvat

Isalill váldá badjelasas Pernille Sørensena barggu, gii lea leamaš gávcci jagi mielde prográmmas.

– Dát lea vearrámus mii munnje livččii sáhttán geavvat, dadjá son skealbmamojiin. Muhto dieđusge stuora gudni, ja Pernille lea mus leamaš ovdagovvan máŋggaid jagiid.

Bård Tufte Johansen illuda sakka ovttasbargat sámi komihkkáriin.

- Moai letne juo ovttas bargan muhtun áigge ja lean oahpásnuvvan suinna, ja moai Johaniin geat letne juo panelas, vuostáiválde su buriin mielain dán čavčča, dadjá Johansen.

– Dáid cukcasiid in muital dáččaide

Isalill lea máŋgii doallan stand-upa Sámis, ja ráhkadan podkastta «Sameting» Dávvet Bruun-Solbakkain.

Su maŋimuš bihttá «Oja, du er nysame?», válde maiddái geahččit bures vuostá.

– Boahtá go dus vuhttot movtge sámi humora?

– Mu sámi perspektiiva boahtá dieđusge oidnosii, muhto mun in vikkat dan oidnosii, in ge hilggo dan, lohká Kolpus.

Isalill muitala viidáseappot ahte su mielas lea erohus doallat stand-up dáža ja sámi gehččiide. Muhtun cukcasiid son muitala dušše sápmelaččaide.

– Go lean eambbo diekkár dážalágan báikkis, de hárve geavahan alkoholismma, eanavuoigatvuođaid dahje buhtadusaid suohtastallanfáddán.

Son čilge ahte lea dan dihte go son dovdá ahte dážat eai soaitte áddet buot beliid, mat leat vuođđun dáidda cukcasiidda.

– Sápmelaš ádde dan, muhto dáža ii dáidde dan áddet, lohká son.

Vuosttaš gii ii leat Oslo-guovllus eret

Isalill lea vuosttaš sámi nissonolmmoš ja finnmárkulaš, gii dál čohkkeda lávdestullui.

Son lea maiddái vuosttaš komihkkár gii boahtá olggobealde Østlándda, ja jáhkká ahte son riggudahttá dán humorprográmma.

– Mus lea sierralágan oaidnu sápmelažžan, finnmárkulažžan ja nissonolmmožin. Leat unnán nissonolbmot humor-Norggas, ja vel unnit sápmelaččat. Dat ahte lea eará perspektiiva go Johanis ja Bårdas lea munnje dušše ovdamunnin, dadjá son.