NRK Meny
Normal

Heevetimmievåhkoe Tråantesne

Jijnjh almetjh Tråantese båeteme daan våhkoen jih edtjieh heevehtidh. Jih gellie ov-messie gapta abpe staaresne.

Tåamma Bransfjell

Tåamma Bransfjell Prahkeste Tråantese vuelkeme.

Foto: Vaino Rensberg / NRK

Tåamma Bransfjell bovtsenbearkoem doekeminie daan våhkoen Tråantesne. Jih dihte fejjene dihte lea staaresne.

– Gosse aejlegen bøøtim, dellie lij na luste bijlesne tjahkasjidh jih vuejnedh gaajhkh saemieh gaptajgujmie. Jih fuehpesne lin edtjin dam orre filmem vuartasjidh, dihte «Sameblod». Tuhjtem luste daesnie årrodh, jih gaptine lea fïerhten biejjetjen aate, Tåamma Bransfjell jeahta.

Lavvo Trondheim Torg

Stoerre låavthgåetie tåarjesne

Foto: Vaino Rensberg / NRK

Stoerre deahpadimmie

Lea jijnje mij deahpede daan våhkoen. Måanta lij saemiej åålmegebiejjie, jih Tråanten Tåarje lij dïeves jih stoerre rïhpestimmie. Jih jååktan Ellinor Marita Jåma jih Laanteburrie- jih beapmoeministere Jon Georg Dale(Frp) utnigan jurjiehtæjjagaahtjeme, mij Jåma vitni.

Jon Georg Dale og Ellinor Marita Jåma

Jon Georg Dale jih Ellinor Marita Jåma

Foto: Vaino Rensberg / NRK

Jih daelie datne maahtah «saemien beetnegigujmie» maeksedh.

Dah båetije biejjieh leah jijnjh konserth, vuesiehtimmieh jih vielie seminaarh. Datne maahtah daesnie abpe programmem vuejnedh: Tråante abpe våhkoem.