Beaivváš sámi našunálateáhter geahččala geasuhit dievdoolbmuid Gába teáhterčájálmassii. Teáhter lea sádden preassadieđáhusa ahte buot dievddut geat bohtet geahččat Gába čájálmasa smávva mátkkis Deanus, Sirbmás, Kárášjogas, Guovdageainnus, Leavnnjas ja Anáris, besset geahččat Gába čájálmasa nuvttá, eai dárbbat máksit bileahta ovddas.
Dása gal Norgga Dásseárvo- ja vealahanáittardeaddji nubbijođiheaddji, Elisabeth Lier Haugseth, ii leat áibbas ovttaoaivilis ja lohká ahte teáhtera gaskkaoamit eai leat vuohkkasat.
Gieldá vealaheami sohkabeliid gaskkas
– Dásseárvoláhka gal čielgasit gieldá vealaheami nissonolbmuid ja dievdoolbmuid gaskkas, ovdamearkka dihte jus earuha hattiid sohkabeliid gaskkas. Nu dadjá Dásseárvo- ja vealahanáittardeaddji nubbijođiheaddji, Elisabeth Lier Haugseth.
Son dadjá ahte lea govttolaš máksit gálvvu ovddas man oažžu, muhto ipmirduvvo eahpegovttolažžan jus nubbi sohkabealli šaddá máksit gálvvu ovddas ja nubbi oažžu dan seamma gálvvu nuvttá.
Dásseárvo- ja vealahanáittardeaddji nubbijođiheaddji, Elisabeth Lier Haugseth:
Vealahanaittardeaddji ja Beaivváš
Hástala earalágan vugiid geavahit
– Beaivváš sámi našunálaeáhtera vuohki dás, namalassii dan go hatti dáfus earuhit nissonolbmuid ja dievdoolbmuid gaskkas, gal lea boastut teáhtera bealis, dadjá Lier Haugseth.
Son hástala baicca teáhtera váldit adnui eará gaskaomiid go nuvttá bileahtaiguin dievdduide, jus leat váttisvuođat dievdduid geasuhit teáhterčájálmasaide.
Ii lean gullange
Beaivváš sámi našunálateáhtera hoavda Rolf Degerlund
Foto: Åse Pulk/NRKBeaivváš sámi našunálateáhtera hoavda Rolf Degerlund ii lohkan oba gullange, iige jurddašan ahte sii leat rihkkon dásseárvolága go mearridedje nuvttá fállat bileahtaid dievdduide geat bohtet Gába-čájálmassii.
Son dadjá ahte sii geat dávjjimusat bohtet teáhterčájálmasaide leat nissonolbmot 40 ja 60 jagi gaskkas, muhto jus sii rihkkot lága go fállet nuvttá bileahtaid dievdduide, de sii gal dan fertejit njulget, dadjá Beaivváš sámi našunálateáhtera hoavda Rolf Degerlund.
Beaivváš sámi našunálateáhtera hoavda:
Beaivváš Sámi Nationálateáhtera hoavda, lohka áigut rievdadit gaskaoami jus sii rihkko lága.
