– Gal dat le hásstalus danen gå dát kurssa l má ájnna dákkir praktihkalasj giellakurssa mij la læhkám gåjt de guhkes ájggáj. Ja muv studenta li muhtema gudi li ållu ådåálgge, valla ålos aj gudi juo álgos ålov máhtti ja ålov dádjadi.
Dav javllá sámegielåhpadiddje Nuortta Universitehtan Sandra Nystø Ráhka, guhti l giellakursav tjadádime, ja adná ulmmen oahppijt åhpadit bachelorgrádaj.
Giellaåhpadiddje tjielggi muhtem oahppe válldi dáv kursav dåssju hárjjidalátjit ja åhpatjit vehi ådå bágojt. Jali aj danen gå dárbahi formálalattjat máhtudagáv váj máhtti bacheloraj joarkket.
- Lågå:
Gássjel åhpadit
Sandra Nystø Ráhka l åhpadiddjen julevsámegiela åvddåkursan mij la gárvedibme sidjij gudi ájggu bachelorgrádaj låhkåt. Nystø Ráhka dåbddå gássjel la gájkajt åhpadit aktan gå giellamáhtudagá nav rievddi oahppij gaskan.
– Diedon la hásstalus åhpadimev hiebadit gå li nav iesj guhtik dásen, muv studenta. Valla dát le má álgos ådåálggekurssa, de mån lav má gæhttjalam; ulmme le má biedjat åhpadimev dan dássáj navti váj divna nahki dav tjuovvot.
Juska oahppij gaskan li moadda gieladáse, de huoman buoragit manná. Dála li hárjjidallamin aktan åhpadiddjijn Sandra Nystø Ráhka; Sonni Eriksen (gb), May Bente Knutsen, Tove Anita Langmo ja Miriam Paulsen.
Foto: Sander Andresen / NRK- Lågå aj:
Huoman ávkken
Akta oahppijs dán kursan la Tove Anita Langmo, gen giellamáhtudagá ælla nav buore vaj máhttá njuolgga alep dásen låhkågoahtet. Langmo doajvvu dát la sunji viehkken.
Langmoa mielas la kurssa ávkken, danen gå bæssá sámástittjat ja danen aj mujttá bágojt.
– Mån bargav Ájluovtan mánájgárden, ja váttsáv dánna gå mån galgav oahppat ienep bágojt.
– Buorre l dát munji, mån hárjjidaláv, ja mån mujtáv ållo bágojt.
- Lågå aj:
