NRK Meny
Normal

Harald Devold lea jápmán

Mannan ija jámii musihkkár ja komponista Harald Devold. Son lea olu bargan ovttas sámi musihkkáriiguin, ja lea leamaš njunnošis musihkkabargguiguin Finnmárkkus.

Harald Devold

Harald Devold lei divššus Drammenis Mátta-Norggas, gosa son jámii mannan ija.

Foto: Knut-Sverre Horn

Devold šattai 51 jagi boarisin ja lei guhkit áigge buohcan borasdávddain.

Ustibat ja musihkkárat Finnmárkkus čogge badjel 800.000 ruvnnu sutnje, maid Devold áiggui geavahit erenoamáš borasdávdadálkkodeapmái Duiskkus.

Bivnnuhis musihkkár

Devold lei eret Langevågas Møre ja Romsdalas, ja válddii musihkkaoahpu Norgga musihkkaallaskuvllas Oslos.

80 logu rájes lea son leamaš okta Norgga eanemusat geavahuvvon freelance-musihkkáriin.

Devold oaččui maid Spellemann bálkkašumi 1990. Dalle son čuojahii Oslo Groove Company joavkkuin.

Fárrii Finnmárkui

Čáhcesullui Nuorta-Finnmárkui fárrii son 1995, ja lea das rájes jođihan earret eará musihkkaovttasbarggu Scene Finnmark (ekstern neahttabáiki) .

Dovddus artisttat geaiguin Devold lea ovttas bargan leat Mari Boine, Angelique Kidjo, Anne Grete Preus, Morten Abel, Jørn Hoel, Ingá Juuso, Kai Somby ja Intrigue.

Electronic World Yoik musihkkajoavkkus «Ája» lei son maid čuojaheaddjin.

Musihkkárat morrašis

Devoldas báhcet golbma máná.

Sosiala mediain dovddahit ollugat morraša go nuorra musihkka áŋggirdeaddji dál lea vádjolan.

ifinnmark.no neahttasiiddus dovddaha Varangerfestivála jođiheaddji, Robert Lundgren, giitevašvuođa go lea beassan bargat ovttas Devoldain.

Maiddái sámi artista Kai Somby lea daid gaskkas guhte otne muittaša Harald Devold.

Kai Somby ja Harald Devold

Kai Somby ja Harald Devold ásaheigga ovttas «Ája» musihkkajoavkku.

Foto: Knut Åserud