– Mu mielas lea diet dakkár joavdelas vierru mas mun in ádde mii das lea ulbmil lea, lohká Liv Tone Boine.
Boine ii leat dušše váhnen, muhto maid Nuorttanastte risttalaš bláđi váldodoaimmaheaddji. Son ii hálit Halloween ávvudeami Sápmái, mas vierrun lea mánáid gárvvuhit gopmiin ja nu sii vázzet viesus vissui ánuheamen njálgaid, jus eai oaččo de áigot skelbmošit.
– Ii leat riekta oahpahit mánáid gopmiin ja iešguđetge ládje gárvvuhit ja vázzit dáluid mielde ja gearjidit. Mánát leat máŋggalágan ja go sin oahpa skelbmošit, de sáhttá dat ovdánit vaikko movt ge, lohká Boine.
Servodatberošteaddji oaivvilda ahte Halloween ii leat dušše stoagus, ja sáhttá leat várálaš.
– Nubbe bealli dies lea ahte mun dieđe oskkildivččen go mun iežan mánáid vázzit dáluid mielde. Go don han it dieđe goasse ge gii dan uvssa leahkku doppe.
Dološ ruohttasat
Wikipedia dieđuid mielde galget Halloweenas leat ruohttasat Mexicoas, Lulli Amerihkás, gos gohčodedje eahkeda «The day of the dead» koloniija áigge 1600-logus. Muhto ovdal dan vel, dolin, galgá vierru čuožžilan Colombia dološ kultuvrras. Olbmot gárvodedje gopmiin ja nu sii ávvudedje iežaset vádjolan fulkkiid risttahas doaluin. Vierru sáhttá leat gitta 3000 jagi boaris, muhto ii okta ge dieđe dan áibbas sihkkarit.
Dološ vierru ovdánii dađistaga Mexicoas gos olbmot gudnijahttegohte jápmán mánáid ja njuorat mánáid. Beaivvi gohčodišgohte «Dia de los Muertos» – The day of the dead – jámežiid beaivi.
Amerihká Halloweena mii lea dovdoseamos ávvudeapmi dálá áigge - Das leat ruohttasat katolalaš risttalaš beaivvis hállemasbeaivvis. Das leat ges ruohttasat keltiska čakča ávvudeamis – Samhain. Dát lea Gaeliska sátni mii mearkkaša seammá go geassi lea loahpageahčen ja áigodat jorggiha dálvvi guvlui.
– Mánát galggaše baicca sámi árbevieru doalahit
Liv Tone Boine muittuha ahte Hállemas lea buot bassi olbmuid beaivi ja sápmelaččat galggaše baicca Hállemas-vieruid oahpahit mánáide.
– Mu mielas lea hui fiinna vierru Hállemas beaivvis muittašit olbmuid geat leat vádjolan ja gudnijahttit sin. Mii fertet oahpahit mánáide dakkár fiinna vieruid ja árvvus atnit sin geat leat leamašan min luhtte, lohká Boine.
Geahča TV-ášši mii lea almmuhuvvon guokte jagi áigi, mas mázelaš Anne Berit Gaup Skum muitala eanet movt son doalaha sámi árbevieru ja vásahusa birra go mánát skelbmošedje suinna.