Háliidit joatkit ovttasbarggu

Kárášjohka ja Guovdageaidnu háliidit joatkit Ávjovári eamiálbmotguovloovttasbarggu, vaikko Porsáŋgu lea dál dieđihan ahte sii geassádit das eret.

Anne Toril Eriksen Balto

Kárášjoga sátnejođiheaddjis Anne Toril Eriksen Baltos lei otne čoahkkin Guovdageainnu suohkaniin Ávjovári eamiálbmotguovllu boahtteáiggis.

Foto: Dragan Čubrilo / NRK

Vaikko Porsáŋggu gielda mannan vahkkus dieđihii ahte geassáda Ávjovári eamiálbmotguovllu ovttasbarggus, de dáhttot guokte eará gieldda joatkit dán ovttasbarggu.

Dáhttu joatkit

Dat bođii otne ovdán go Guovdageainnu suohkana ovddasteaddjit čoahkkinaste Kárášjoga sátnejođiheddjiin Anne Toril Eriksen Baltoin. Son lohká ahte sii fertejit loktet ášši Ávjovári ráđđái meannudeapmái, muhto sis lea ain dáhttu joatkit ovttasbarggu.

- Lávki viidáseappot lea aŋkke dat dáhttu sihke Kárášjoga ja Guovdageainnu bealis ahte mii sámi gielddat ain ovttasbargat. Mii oaidnit ahte mii leat hui ovttaláganat ja mis leat hui ovttalágan hástalusat ja maiddái go dat gielddareforma lea boađi boađi, de fertejit sámi gielddat ovttasbargat ja váldit ovddasvástádusa, dadjá Eriksen Balto.

Ovttasbargu álggii 2006:s

Ávjovári eamiálbmotguovllu ovttasbargu álggahuvvui 2006:s. Dás leat fárus Guovdageainnu suohkan, Kárášjoga gielda ja Porsáŋggu gielda. Ráđi ulbmilin lei ovddidit áššiid mat bohtet buorrin dán golmma gieldda ássiide ja jurdda lei ahte dát golbma gieldda galge ovttasráđiid ovddidit áššiid.

Lei maid jurdda ahte ráđđi galgá ovttasbargat Sámedikkiin, Stáhtain ja rádjagielddaiguin.

Ii leat doaibmán

Mannan vahkku mearridii Porsáŋggu gielddastivra botket dán ovttasbarggu. Kárášjoga sátnejođiheaddji Anne Toril Eriksen Balto mieđiha ahte dát ovttasbargu ii leat doaibmán nugo galgá.

- Ráđis ii leat leamašan doarvái resurssat dákkár hálddahuslaš bealis ráhkkanahttit ja ovddidit áššiid. Jus ii bidjo ruhta ovttage gieldda bealis de ii šatta nu olu dahkkot, lohká Eriksen Balto.