NRK Meny
Normal

Háliida ovttastuhttit heahtedieđubálvalusaid ja sajáiduhttit daid Girkonjárgii

– Dán lea dehálaš dahkat jos galgá bisuhit ja nannet oppalaš gearggusvuođa ja heahtebálvalusa Finnmárkkus, cealká filkka politiijameašttir.

Ellen Katrine Hætta

Finnmárkku politiijameašttir, Ellen Katrine Hætta, háliida čohkket Finnmárkku heahtedieđubálvalusaid.

Foto: Politiet

Servodatsihkarvuođa- ja gearggusvuođadirektoráhtta (DSB) ii leat velá mearridan galgágo 110-heahteguovddáš bisuhuvvot nu movt dál.

Nubbi molssaeaktu lea ovttastahttit Finnmárkku ja Romssa 110-guovlluid oktan guovlun.

Fuolastuvvan

– Mun gal fuolastuvvan ja jearan makkár oppalaš gearggusvuohta šaddá Finnmárkkus, jus 110-guovddáš sirdojuvvo Romsii, dadjá politiijameašttir.

Son čilge ahte Finnmárkku gádjunfágalaš birrasasat, masa gullet politiijat, buollindustehus ja dearvvašvuođasuorgi, lea ovttamielalašvuohta sajáiduhttin ovtta báikái Finnmárkkus, namalassii Girkonjárgii lea dat mii lea buoremus Finnmárkku álbmogii.

– Sajáiduhttin Girkonjárgii nanne maiddái coavcci ja vejolašvuođa vuostáiváldit heahtedieđuid sámegillii, dadjá Hætta.

Čállán reivve

– Mii leat juo gulahallamin Mátta-Várjjaga gielddain dainna áigumušain ahte sajáiduhttit heahtebálvalusaid politiijavistti laktavistái Girkonjárggas, muitala Hætta.

Son lea čállán reivve Servodatsihkarvuođa- ja gearggusvuođadirektoráhttii, mas son bivdá ahte Finnmárkku 110-guovlu bisuhuvvo ja ahte Mátta-Várjjat gielda oažžut bargun ásahit Finnmárkku 110-guovddáža Girkonjárgii.

Maiddái Finnmárkku buollindustehushoavddat ja 110-guovddážat leat buktán iežaset fágalaš árvvoštallama ja sis lea maiddái seamma čoahkkáigeassu ahte Girkonjárga lea vuohkkaseamos sajáiduhttinbáikin 110-guovddážii.