NRK Meny
Normal

Háliida oktasaš kvena ja sámi viesu

Romsii soaitá ásahuvvot oktasašsámi ja kvenaviessu, goappešservviid njunnošat leaba mielas ovttas bargat.

Tromsø
Foto: Thomas Sørensen / NRK

Nora Ollila

Kvena nuoraid jođiheaddji Nora Ollila

Foto: Siv Eli Vuolab / NRK

– Livčče lunddolaš Romsii ásahit oktasaš deaivvadanbáikki sámiide ja kvenaide, lohká kvena nuoraid jođiheaddji Nora Ollila.

Álbmotčoahkkimis Romssas dán vahkus, dovddahedje gávpotsámit ahte sii dárbbašit deaivvadanbáikki. Seamma čoahkkimis Ollila ovddidii ge evttohusa ásahit oktasaš viesu sámiide ja kvenaide.

– Sullasaš hástalusat

Sámiin ja kvenain leat olu sullasaš hástalusat giela ja kultuvrra seailluheame ektui - ja danne livččege lunddolaš čohkket návccaid ovtta sadjái, ja nu maid nannet ovttasbarggu oktasaš deaivvadanbáikki bokte Romssas lohka Ollila.

Son muittuha ahte kvenanuorat ja sámenuorat barget juo bures ovttas, ja nu lea juo buorre vuođđu soabadit seamma dálus.

– Berrešii ásahuvvot sámeviessu

Sauli Guttorm

Romssa sámesearvvi njunuš, Sauli Guttorm.

Foto: Siv Eli Vuolab / NRK

Álbmotčoahkkimis maid sámediggi ja Gáisi giellaguovddáš lágideigga ovddit beaivvi árvvoštallan dihte Romssa suohkana ja sámedikki ovttasbargošiehtadusa, dovddahedje ollugat ahte Romsii farggamusat berre ásahuvvot sámeviessu.

Šiehtadusas lea maid jo čállon ahte dákkár deaivvadanbáiki berre ásahuvvot boahtteáiggis.

– Buorre jurdda

Romssa sámesearvvi njunuš, Sauli Guttorm, lohká die leat buorre jurdda. Ovdalgo gávpotsámiid viessu šaddá duohtan Romssas fertejit maid formálalaš bealit nugo viesu jođiheapme ja oamasteapmi čielggaduvvot, ja dán olis dáidet boahtit muhtun čuolmmat mat dagahit váddáseabbon viesu gohčodit oktasaš sámi ja kvena viessun, lohká Guttorm.