Sápmi Pride prošeaktajođiheaddji Dávvet-Bruun Solbakk lea dán vahku Guovdageainnus, lágideame sámi bonjuide doaluid. Olles geasi lea son johtán festiválaid mielde ja márkanfievrridan dáid doaluid.
– Go mun duođai beroštan juoga mas, de beroštan 100 proseantta das, mojohallá deatnulaš.
Ii leat vásihan vuostehágu
Dávvet ii lean ieš mielde mearrideame sirdit doaluid Guovdageidnui, muhto doarju dán mearrádusa.
Sápmi Pride prošeaktajođiheaddji Dávvet-Bruun Solbakk sávvá fiinna ja ráfálaš doaluid
Foto: Dragan Cubrilo / NRK– Guovdageaidnu orru gárvvis ahte Sápmi Pride-doalut galget leat dáppe juste dál.
Vaikko Guovdageainnu searvegotteráđđi celkkii ahte sii eai hálit vihahit bonju páraid sin girkuin, de ii leat Dávvet vásihan vuostehágu dán gilis.
– Mun in dieđe lea go Guovdageainnus olu vuosteháhku bonjuide, buohkaid geaid lean deaivan Guovdageainnus leat leamaš hirbmat positiivat.
Sámi «njuolggadusat»
Jus leat Dávveha Instagram-govaid oainnestan, de leat sihkkarit mearkkašan ahte sus lea stuora beroštupmi govvideapmái ja gárvvuid geahččaladdat.
– Soitet smiehttat ahte mun lean dego «freaka», muhto jáhkán go olbmot dearvvahit mu, de oidnet ahte mun beroštan dain seamma dinggain, muitala Solbakk.
Dutkit leat gávnnahan ahte . Jus muitalat ahte leat homofiila, de gehččet du eanet nissonolmmožin. Dávvet háliidivččii rievdadusa dása. Danne lea prošeaktajođiheaddjái dehálaš maiddái digaštallat mo sámi bonjuid dili sáhttá buoridit.
NRK Sápmi lágida paneladigaštallama bearjadaga, gos fáddá lea «Mo sáhttá min servodat láhčit buoret dili sámi bonjuide?».
– Mu mielas orru ahte sámi servodagas leat olu «njuolggadusat». Mo galgá čiŋadit ja láhttet, ja leat hui garra sohkabeal norpmat. Livččii buorre ložžet dieid «njuolggadusaid», vai mii čáhkket saji buohkaide.
Lea sadji buohkaide
Sápmi Pride, mii álggii duorastaga, lea rabas buohkaide, beroškeahttá goappá sohkabeallái ráhkásmuvat. Dát lea dehálaš Dávvehii.
– Sávan ahte sámi bonjut ja earát besset deaivvadit, vai olbmot oidnet ahte dát ii leat nu várálaš. Go beassá deaivvadit de lea álkit dohkkehit nuppi nuppi. Mii leat buohkat iešguđetláganat ja dat leat áibbas ortnegis.
