NRK Meny
Normal

Háliida čoahkkima Ráđđehusain sámi buohccidivššároahpu birra

Sámi allaskuvlla čielggadusa Grunnlag for en samisk sykepleier utdanning vuođul bivdá Sámediggi dál oktasaščoahkkima Dearvvašvuođa- ja fuolahusdepartemeanttain ja Máhttodepartemeanttain digaštallat oahppofálaldaga ásaheamis.

Sykepleier gir en dose antibiotika til en pasient

Čájáhusgovva. Ekonomiija lea stuorámus caggin ásahit sámi buohccidivššároahpu.

Foto: Siri V. Saugstad / NRK

Mikkel Eskil Mikkelsen

Sámediggeráđđelahttu Mikkel Eskil Mikkelsen.

Foto: Kenneth Hætta / Preassagovva

– Lea oahpis ahte váilot buohccidivššárat geain lea sámi giella- ja kulturgelbbolašvuohta. Sámediggi, guovddášeiseválddit ja gielddat main leat sámi buohccit leat máŋgii čujuhan dan. Min mielas lea Sámi allaskuvlla ja UiT álgga deaŧalaš doaibmabidjun dasa ahte dustet dán hástalusa, dadjá ráđđelahttu Mikkel Eskil Mikkelsen.

Sámi allaskuvla ja UiT Norgga Árktalaš universitehta leat 2015 dálvvi rájes bargan dainna áigumušain ahte álggahit bachelorprográmma buohccidivššus sámegillii.

Dan barggu oktavuođas attii Sámediggi prošeaktaruđaid čielggadit oahpu vuođu. Čielggadus gávnnaha ahte lea hoahppu ásahit sámi buohccidivššároahpu.

Ekonomalaš rámmat caggin

Stuorra caggin viidásat barggus leat dat ekonomalaš rámmat mat oahppoásahusat fertejit váldit vuhtii. Ii oro leamen stuorra vejolašvuohta sidjiide bisuhit fálaldaga jus eai oaččo ruđaid olggobealde.

Sámediggeráđđi lea meannudan ášši mannan vahkus ja ipmirda čuolmmaid ásaheami oktavuođas.

– Mii oaivvildit ahte guovddáš eiseválddiin lea čielga ovddasvástádus láhčimis dasa ahte sámi buohccit sáhttet geavahit gielaset dearvvašvuođa- ja fuolahusbálvalusas. Nu go maiddái čielggadus deattasta. Danne mii leat bivdán oktasaš čoahkkima departemeanttaiguin gávdnan dihtii čovdosiid oahpu ásaheapmái, loahpaha Mikkelsen.