– Jus beasaše viidábut bivdit gonagasreappáid, de nogašii lobihis bivdu. Dán oaivvilda Hammarfeasta guolástansearvvi jođiheaddji Svein Lyder.
Dán čávčča leat fuobmán olu lobihis reabbábivddu.
Eambbogat mielde diinasbivdui
Dál besset friddja bivdit reappáid fávlelis go guoktenuppelohkái nautalaš miilla gáttis, oarjjabealde Davvenjárgga, ja siskit Porsáŋgguvuona.
Guolástansearvi dáhtošii dán ráji sirdit nuorttas Čorgažii, ja gáddelii guđa nautalaš miilla duohkái.
Nu beasaše eambbogat mielde dán dienasbivdui, ja sii jáhkket maid bivdiit buorebut doahttalit njuolggadusaid. Maiddái sidjiide geain lea juo reabbáearri viidduše bivdinguovlu.
Ipmirda lobihis bivddu
Hammarfeasta guolástansearvvi jođiheaddji Svein Lyder ipmirda dan go muhtumat leat lobihemiid bivdán. Nu go dán jagi go illá leat jođihan dorski, de muhtumiidda lea reabbábivdu áidna sisaboahtu.
Mannan vahkus bođii ovdan ahte Guolástusdirektoráhtta ii atte šat reabbáeriid dán jagi go lea leamašan nu olu lobihis bivdu. Dán ii ipmir Lyder.
– Mu mielas orrot dán ládje čievččasteame reabbábivdiid, vaikko mearas leat vaikko man olu reappát, lohká Lyder.