Davvi-Norggas máksá disdaga elrávdnji 2,12 ruvnno kilowahttadiimmus (kWh), ja alimus haddi galgá leat 5,03 ruvnno. Disdaga gaskamearalašhaddi juohke kilowahttadiimmus lea 1,64 ruvnno eanet go dan mii lei mánnodaga, ja 12,4 evrre hálbbit go dan maid lei seamma beaivvi diibmá, nu čájehit Nord Pool neahttasiiddu logut.
Rå Biopark AS, Ivgobađas, Davvi-Romssas, oaččo 39 miljovnna ruvnno ruhtadoarjaga Enovas, vai sáhttet huksegoahtit máilmmi davimus industriijalaš biogássarusttega. Rusttet, mii galgá leat gárvvis jagi 2025, galgá buvttadit biogássa luoddajohtolahkii ja CO₂ biebmogálvoindustriijai.
Ruošša dievdu gii lea áššáiduhtton Davvi-Romssa ja Sážžá diggegottis, go galgá leat girdán dronain Girkonjárggas golggotmánus, ii miehta iežas sivalažžan. Muhto son miehta dahkkodilálalašvuođaid ja ahte son lea girdán dronain. Dievddu bealušteaddji dadjá sivvan dasa lea go dievdu ii dovdan njuolggadusaid das ahte ruoššalaččat eai oaččo girdit dronain Norggas. Dievdu váldui gitta golggotmánu 15. beaivvi Romssas.
