NRK Meny
Normal

Guovdageainnus eai dárbbaš šat vuoššat čázi

Ovttasráđiid Biebmobearráigeahčuin heaittiha Guovdageainnu suohkan vuoššandieđu buot dolliide geat ožžot čázi čáhcerusttegis Guovdageainnu márkanbáikkis.

Noe vann
Foto: Oddbjørg Hætta Sara / NRK

Čázi ivdnelohku lea jámmadit njiedjan dan maŋemus áiggi, nu ahte dál lea fas dásis mii dahká ahte suohkana UV-rusttet lágida hygenalaš ráinnas juhkančázi, dieđiha suohkan iežas ruovttusiiddus.

Čáhci klorerejuvvo mánnodaga 12.09. rádjái. Dan rájes ii šat bija suohkan klora čáhcái. Dat klora man leat bidjan lea čázis moadde beaivvi vel maŋŋel go leat heaitán kloreremis. Dat doaibmá lassi sihkarvuođadoaibman. Dasa lassin váldet lassi čáhceiskosiid ovtta áiggi ovddasguvlui.

Guovdageainnu márkanbáikkis leat šaddan vuoššat čázi guokte vahku, borgemánu 26. beaivvi rájes . Jus čáhcekvalitehta fas rievdá, de sáhttá fas boahtit diehtu vuoššat čázi, čállá vel suohkan.