NRK Meny
Normal

Guovdageainnus dorjot olu badjeolbmot johttisápmelaččaid listta

Kárášjogas lea dilli nuppe láhkai.

Guovdageainnu Johttisápmelažžaid lista

Guovdageainnu Johttisápmelažžaid listtas leat vihtta áirasa suohkanstivrras.

Foto: Johan Mathis Gaup / NRK

Guovdageainnu Johttisápmelaččaid listtas (GJL) leat vihtta áirasa suohkanstivrras, ja lea ge stuorimus bellodat Guovdageainnu suohkanstivrras, dássálaga Sámeálbmot bellodagain mas leat maid vihtta áirasa. Kárášjoga johttisápmelaččaid listta (KJL) lea ges unnimus bellodat Kárášjoga gielddastivrras, ovttain áirasiin, čállá Ávvir.

Guovdageainnu Johttisápmelaččaid listta sátnejođiheaddjievttohas, Anders S. Buljo, lohká Kárášjoga leat unnánat badjeolmot go Guovdageainnus, ja dan geažil eai soaitte nu olu jienaid oažžut.

Anders S. Buljo

Anders S. Buljo.

Foto: Liv Inger Somby / NRK

– Kárášjogas leat maid áiggiid čađa leamašan hui nannosat dáčča bellodagat, nu go Bargiidbellodat ja Guovddášbellodat, lohká Buljo

Logut mat valg.no neahttasiiddus čájehit ahte Guovdageainnus ledje maŋemuš válggas 1534 olbmo geat jienastedje. Dáid gaskkas jienastedje 396 olbmo Guovdageainnu Johttisápmelaččaid listta. Dát leat 25,8 proseantta jienain. Kárášjogas ges ledje 1421 geat jienastedje, ja 85 jienastedje Kárášjoga Johttisápmelaččaid listta. Dat ii leat go guhtta proseantta jienasteddjiin geat dorjo sin.

Maŋŋonan válgagižžuin

Kárášjoga Johttisápmelaččaid listta sátnejođiheaddjievttohas, Anders Somby Jr lohká iežaset válgagižžu maŋŋonan. Dál son lohká iežas gearggus vuolgit johttit boazosápmelaččaid mielde geasseorohagain.

– Min bellodat manai NRK Sámi oaiviliskkadeamis fas seamma dássái go ovddit áigodagas leimmet ja goalmmádin stuorimus bellodat Kárášjogas. Sávvamis mii ovdánit fas, vai oažžut juoba guokte áirasa gielddastivrii, lohká Somby Avvirii.

Somby ii loga sáhttit čilget manin sii masse nuppi áirasa gielddastivrras maŋemus válggas, muhto lohpida boazosámiid beroštumiid váldit vuhtii jus sii ožžot luohttámuša boahtte áigodagas gielddastivrras.