Duottarčiekčama boađus šattai 3-0 Guovdageidnui Nordlysa vuostá lávvordaga.
Guovdageainno IL hárjeheaddji Issat Ole Hætta dadjá ahte joavkku stuora mihttu lea álo časkit Kárášjoga spáppačiekčanjoavkku.
– Mu mielas mii ánssášeimmet vuoitit. Vuosttaš diibmobealle lei váttis go Nordlys čiekčit vihke hui olu, muhto go mii oaččuimet ráŋggáštusčievččasteami ja go vel nuppi moala ožžuimet ovdal bottu, de gal dadjen čikčiide bottus, ahte mii čiekčat várrogasat vuosttáš 15 minuhtta nuppi vuorus
Guovdageaidnu vuittii
Guovdageainnu njunuščiekči Nils Erik "Nippa" Oskal báži spáppa molli ráŋggáštusčievččasteamis sullii bealle muttos vuosttáš vuorus. Juste ovdalaš bottu bážii vel Johan Egil Pulk joavkku nuppi moala.
Nordlys álggi nuppi vuoru buoremusat ja sis ledje vejolašvuođat duohpat Guovdageainnu go lei 2-0 vuoittubeal, muhto Guovdageainnu čiekči Nils Johan "Gino" Eira baicca bážii joavkku goalmmát moala.
Duoddara gonagasat
Guovdageaidnu beassá dál čevllohallat duoddara gonagassan gitta joavkkut fas deaivvadit Kárášjogas.
– Eat mii šaddán Duoddara gonagasat. Mii leat duoddara gonagasat. Ja dan mii leat leamašan juo oalle guhka. Guovdageainnus lea álo mihttu jobe goit časkit Nordlysa, dadjá Guovdageainno hárjeheaddji Hætta.
Eai skurtnjagan
Nordlysa fánsa Liv Eli Holmestrand ii loga kárášjohkalaččaid vuollanan gal.
– Albma suohtas vaikko vuoittáhalaimet. Lei somá beare beassát vásihit dan buori spáppačiekčama. Suohtas oaidnit ahte mis leat ná olu buori sámi nuorra čiekči. Ja man falit sii ledje. Mu mielas gal dain čikčiin livčče muhtumat berren beassát Sámi riikajovkui, go nu buorit sii ledje, dadjá son.
