Ovdal gilvvuid sihke Ájluovtta skåvllå oahppit ja Guovdageainnu nuoraidskuvlla oahppit muitaledje iežaset lohkan veháš Sámedikki birra. Dasa lassin oahppit muitaledje iežaset čuovvun ođđasiid.
Diibmá Guovdageaidnnu nuoraidskuvlla joavku lei Dieđátgo-gilvvuid finálas. 2008:s skuvlla joavku vuittii nuoraidskuvllaoahppiid rádiodiehtogilvvuid. Maiddái dán jagi Guovdageainnu joavku lei njunnožis vuosttas gažaldaga rájes 2. álgovuorus. Ájluovtta joavku (2,5) vuoittahalai maŋážassii Guovdageidnui guđain čuoggáin (8,5) Dieđátgo-gilvvuid 2. álgovuorus.
Dieđátgo 2010-gilvvuid 2. álgovuorru sáddejuvvui NRK Sámi Radios 28.1.2010 d. 16.30.
GULDAL:
- Somás gilvvut
Ájluovtta oahppit eai lean nu beare haga behtton, vaikko vuoittahallege. Sii lohket áigut searvat Dieđátgo-gilvvuide ođđasit boahtte jagi.
– Dát lei suohtas, logai 16-jahkásaš Einar Ráhka dalán gilvvuid maŋŋá.
– Dat ii daga nu olu, dovddahiiges 13-jahkásaš Ole Fredrik Nerdgård.
– Sii fertejit lohkat eanet boahtte jagi gilvvuid várás, muitaliiges 14-jahkásaš Trond Edvard Paulsen.
Guovdageainnu nuoraidskuvlla oahppiid mielas lei somá vuoitit 2. álgovuoru ja beassat viidásut gaskavurrui.
– Gal dát lei oba somá, dovddahii 15-jahkásaš Martin Buljo gilvvuid maŋŋá.
– Dál leat hui buorit dovddut. Dat lea veahkehan lohkat. Ná čilgiiges 13-jahkásaš Elle Martine Eira.
– Váttes gažaldagat
Oahppiid mielas muhtun gažaldagat ledje oalle váddásat. Martin Buljo, dovddahiige, ahte sii fertejit vel eanet lohkat gaskavurrui.
– Dál sii gal fertejit vissa juohke beaivve lohkat ja čuovvut ođđasiid. Lohkat maiddái ruovttus, muitalii Buljo.
– Sii fertejit hárjehallat maiddái sámegiela grammatihka eanet, čilgiiges 15-jahkásaš Anne Biret Pulk.
Oasseváldit
Ájluovtta skåvllå Dieđátgo-joavku:
- 16-jahkásaš Einar Ráhka, guhte vázzá 10. luohkás
- 13-jahkásaš Ole Fredrik Nerdgård, guhte vázzá 8. luohkás
- 14-jahkásaš Trond Edvard Paulsen, guhte vázzá 9.luohkás
Guovdageainnu nuoraidskuvlla Dieđátgo-joavku:
- 15-jahkásaš Anne Biret Pulk, guhte vázzá 9. luohkás
- 13-jahkásaš Elle Martine Eira, guhte vázzá 8. luohkás|
- 15-jahkásaš Martin Buljo, guhte vázzá 10. luohkás
Gažaldagat ja rivttes vástádusat
1. Rehket
- Man olu lea: 22 + 33 + 11 + 9 + 35? 110.
- Dii lehpet váldán loana báŋkkus 120.000 ruvnnu. Loana jahkereantu lea guhtta proseantta. Man olu gártabehtet máksit reanttu 180 beaivvis? 3.600 ruvnnu.
2. Musihkka
- Sámi álbmotlávlla, Sámi soga lávlla lea, lea Isak Saba čállin dikta. Goas dat almmuhuvvui vuosttas háve? 1906:s.
- Čuovvovaččat gullabehtet guokte artistta. Guldalehket dárkilit! Mii dán guovtti artisttas lea oktasaš? Soai leaba guktot vuoitán guktii Sámi Grand prix-gilvvuid lávlunoasi.
3. Sámegiella
- Rievdadehket čuovvovaš cealkagiid biehttalancealkkan:Go doai vuolgibeahtti, de moaige vulge. Lehpetgo dii fitnan skuvllas? Rivttes vástádusat: Go doai eahppi vuolgge, de moaige ean vuolgge. Ehpetgo dii leat fitnan skuvllas?
- Adjektiivvain leat golbma veardidanhámi. Maiddái máŋgga advearbba sáhttá veardidit. Sojahehpet advearbbaid dávjá ja guhká sihke komparatiivvas ja superlatiivvas? Dávjá, dávjjit ~ dávjjibut, dávjjimus ~ dávjjimusat ~ dávjjimustá. Guhká, guhkit, guhkimus ~ guhkimusat~ guhkimustá.
4. Osku
- Sámiid oskkus nissonipmiliin lea guovddáš sadji obmo riegádeamis ja bajásšaddamis. Namuhehket njeallje deháleamos nissonipmila. RIvttes vástádus: Máttáráhkka, Sáráhkka, Juoksáhkká ja Uksáhkká.
- Manin muslimat gohčodit iežaset bassi čállaga? Koránan.
5. Feara mii
- Guđiin sániin bohtet čuovvovaš oanádusat: SVL, SNF, SSL ja SHL? Sámi Valáštallanlihttu, Sámi nissonforum, Sámi spábbačiekčanlihttu ja Sámi heargevuodjinlihttu.
- Čuovvovaččat gullabehtet oasáža ođđasiin, maid muitaleimmet ođđajagimánu 8. beaivve dán jagi, go muhtun áittii goddit sápmelaččaid skuvllas. Guldalehket dárkilit, guđe skuvllas ja gos dát dáhpáhuvai? Kongsbakkena skuvllas, Tromssas.
6. Sámepolitihkka
- Álggos gullabehket golbma olbmo hállamen. Guldalehket dárkilit! Mii dán golbmasis lea oktasaš? Sii leat buohkat Sámediggepresideanttat.
- Dasto gullabehket oasáža mannan čavčča Norgga Sámediggerahpamis. Mii dalle manai boastut? Norgga Sámediggepresideanta, Egil Olli, gohčodii Gonagas Haralda Gonagas Olavan.
