Sámedikkis lea otne čoahkkin Davvi Dearvvasvuođain dálvvi váttes guohtondili dihtii. Sámediggeráđđi Runar Myrnes Balto ja politihkalaš ráđđeaddi John Mathis Utsi čoahkkinastiba Davvi Dearvvasvuođa stivrajođiheddjiin Renate Larseniin. Guohtumat lohkkašuvve jo skábman molsašuddi dálkki dihtii. Miehtá boazodoalloguovllu leat olbmot šaddan biebmat bohccuid. Dát lea čuohcan sihke ruhtadillái ja olbmuid dearvvasvuhtii.
Ruoŧŧa ja Suopma leat árrat iđit otne formalalaččat ohcan miellahttun Natoi. Ohcamušat geigejuvvojedje váldočálli Jens Stoltenberga kántuvrii. Suoma presideanta lohká jáhkkit diplomatiijain nagadit gálgat čuolmma Tyrkiain mii biehttala dohkkeheames dán guovtti riikka Nato miellahttovuođa. Tyrkia presideanta lohká Suoma ja Ruoŧa várjalit terroristtaid go addet asyla kurdáriidda ja earáide geat vuostálastet su politihka.
Finnmárkku báhtareaddjiid vuostáiváldinguovddáš lea goasii guorus vaikko badjel 16 600 báhtareaddji leat boahtán Norgii guovvamánu 25. beaivve rájes. Mátta-Várjjaga sátnejođiheaddji Lena Norum Bergeng oaivvilda, ahte ádjána menddo guhká ovdal go báhtareaddjit bohtet gielddaide. Gielda sáhtašii váldit vuostá 140 báhtareaddji. Dál leat 11 báhtareaddji boahtán gildii, muhto ásset oahppásiid luhtte.
