Oarjelsámi govvejeaddji, govvajournalistta ja duojár Naina Helén Jåma, Snoasas eret, lea válljejuvvon dán jagi Europa govvá fierpmádaga Futures-prográmmii.
Son lea okta sullii 100 govvejeaddjis geat ožžot vejolašvuođa dán prográmma čađa ovddidit sin prošeavttaid, viiddidit sin oktavuođaid govvá ámmátolbmuiguin miehtá máilmmi, leahkit mielde čájáhusaiguin, vuovdalit iežaset dán govva fierpmádaga lávddis ja maiddai beassat leahkit mielde oktasaš čájáhusain Ungára oaivegávpogis Budapestas.
Dán muitala SR Sámerádioi.
Jåma govat leat geavahuvvon nu go The New York Times:s, The Guardian:s, Aftonbladetis ja VG áviissas.
– Somá go mu barggut ná čalmmustahttojuvvo ja rámiduvvo, lohká Jåma.
Guovddášbellodaga (Gb) mannan vahkkoloahpa riikačoahkkin Troanddimis hilggui gieđahallamis Fovsen-ášši, vaikko máŋga máŋga sápmelaš áirasa ovddidedje ášši váldodigáštallamis (generaldebatten).
Earret eará Gb sámediggejoavkku párlamentáralaš jođiheaddji Elisabeth Erke, stáhtačálli Nancy Porsanger Anti ja Lill-Therese Holm Varsi dolle sáhkavuoru Fovsen-áššis.
– Jáhkán min njunušpolitihkkáriin lea váttis áddet dán ášši ja manne dat lea nu dehálaš sápmelaččaide, oaivvilda Erke.
Eanandoallo- ja borramušministtar Sandra Borch dadjá dán:
– Mis (ráđđehusas) lea olu oahppat Fovsen-ášši gieđahallamis. Dát lea váttis ášši. Dál fertet geahččat ovddosguvlui ja mo mii ovttasráđiid boazodoaluin buoremusat sáhtášeimmet čoavdit dán ášši, dadjá Borch.
Dál lea ásahuvvon dutkanprošeakta mii galgga geahččat ja árvvoštallat Norgga duohtavuođa- ja soabahankommišuvdna bargguid.
Dán gease han galgga Duohtavuođa- ja soabahankommišuvdna geiget dan sin raporta mas 2018 rájes leat guorahallan dáruiduhttima váikkuhusaid, earret eará sápmelaččaid ja kvenaid hárrái.
Dutkanprošeakta maid gohččodit TRUCOM, dan mihttomearri lea dutkat mo Norga, mii lea bures ásahuvvon demokráhtalaš čálgostáhta, geahččala Duohtavuođa- ja soabahankommišuvnna ásahemiin njulget guhkesáigásaš dáruiduhttinpolitihka váikkuhusaid sihke sápmelaččaid ektui eamiálbmogin, ja nationála minoritehtajoavkkuid ektui.
Dát lea UiT Norgga árktalaš universitehta Mánáidsuodjalusa ja sosiála barggu instituhtta ovttasbargoprošeaktan Chr. Michelsen instituhtain Bergenis.
Earret eará leaba Birgitta Fossum ja Veli-Pekka Lehtola dán doaimma referánsajoavkkus.
