«Movttegis nieiddat»  – álo leamašan bivnnut

Odne buollái beanta drámá musihkkamáilmmis. Guokte musihkkabuvttadeaddji almmuheigga juste seamma luohtái cover-veršuvnna. Leago dá PR-stunt?

Movttegis nieiddat - cover
Foto: Pressebilder

Lea šaddan juo dáhpin ahte oallut musihkkárat almmuhit ođđa šuoŋaid bearjadagaid.

Dán bearjadaga šadde sámi musihkkaberošteaddjit veaháš seahka sisa go fáhkka almmuhuvvoje guokte luođi, main juste seamma namma : «Movttegis nieiddat»

Leaba musihkkabuvttadeaddjiguovttus Ivan Buljo ja Bernt Mikkel Haglund geat almmuheigga luođi maid Issát Sámmol Hætta bijai Máze nieiddaide jagi 2000:is.

Bernt Mikkel Haglund

GUOKTE JUOIGI: Musihkkabuvttadeaddji Bernt Mikkel Haglund almmuha «Movttegis nieiddat» luođi guvttiin juigiin; Elen Marianne Utsi ja Piera Eira.

Foto: Kjell Are Guttorm / NRK

Buollái go gilvu?

Leimmet áigon almmuhit luođi easka moatti vahkku geahčen, muhto go oidnen ahte Ivan Buljo almmuhii ahte sus boahtá dát luohti odne, de rievdadeimmet mii maid dan almmuheami otnážii, muitala Haglund.

Ivan Buljo atná imašin go Haglund nu dagai, muhto váldá dan alcces rápmin.

Son soaitá ballán ahte mu luohti šaddá nu bivnnut ahte olbmot eai šat fuomáš su luođi maŋŋel, mojohallá Buljo.

Ivan Buljo

ÁHČČI JUOIGÁ: Musihkkabuvttadeaddji Ivan Buljo almmuha ges «Movttegis nieiddat» luođi iežas áhčiin, Nils Henrik Buljoin.

Foto: Ellen Agnete Norvang / NRK

Haglund šiitá ahte lea gilvvus sáhka.

– Musihkka lea subjektiivvalaš, ja dan sáhttá guldalit máŋgga málles. Somá ahte leat guokte goabbatlágan luođi mat almmuhuvvoba oktanagas, lohka son.

Issát Sámmol movttet

Son guhte bijai luođi, Issát Sámmol Hætta (68), lea movttet go movttegis nieiddaid luohti ain lea nu bivnnut.

Issát Sámmol Hætta

II VUOS GULLAN: Issát Sámmol Hætta ii loga vel gullan goappaš luđiid.

Foto: Privat

Erenoamáš suohtas lea go nuorat ráhkadit iežaset veršuvnnaid

Issát Sámmol Hætta

Ii leat vuosttašgeardde go earát háliidit juoigat dán luođi iežaset málle mielde.

Kara-X, skutercross
Jagi 2000:is galge Guovdageainnus doallat Norgga meašttir gilvvuid Skutercrossas.
Aki Pihlaja, Kara-X, skutercross
– De jearai Heaika Hætta ahte in go mun gilleše dien luohtái čállit skutergilvo-teavstta. Nu mun dahken.

Fáhkka gullogođii nuoraid biillain dat skutergilvo-luohti.

Issát Sámmol Hætta

– Lei hui suohtas. Dalle leigga musihkkárat ráhkadan luođi dan málle mielde masa nuorat liikoje, muittaša Hætta.

Luohti heive buot movttegis nieiddaide

Vihtta jagi maŋŋel easka almmuhuvvui luohti daiguin dajahusaiguin mainna riegádii álgoálggus, movttegis nieiddaide.

Jan Ole Hermansen
Dan juoiggai Jan Ole Hermansen.

Leago njulgestaga Máze nieiddaide dát luohti?

- Lea, vaikko heive vel earáide maid. Movttegis nieiddat gal leat máŋgga sajis Sámis, dadjá Hætta.

Fiinna luohti ánssáša guokte almmuheami

Ivan Buljo lohka imaštallat go Haglund vállje almmuhit seamma beaivvi go son, muhto NRK Sápmi lihkká jearrá sus:

- Leatgo sihkár ahte dát ii leat PR-stunt dutnos?

Buljo bohkosa.

– Lea čuođi proseantta sihkar ahte dan gal ii leat, lohka son, ovdal joatká;

– Muhto nu fiinna luohti go dá lea, de lea jalla somá ahte dat oažžu dan fuomášumi maid dat ánssáša. Somá go iešguđetlágan veršuvnnat bohtet dan luođis, vuoi luohti deaivá viidát.

Haglund orro ovttaoaivilis.

- Dat ahte luođit almmuhuvvoba oktanaga dáidá addit eanet fuomášumi goappašat luđiide. Ja dat han orro mihá buoret čoavddus go jus livččiimet easka moatti vahkku geahčen almmuhit dan nuppi, loahpaha Haglund.

Goappaš luđiid gávnnat URBI - New Music Sápmi listtus.

Vuoi lea čorgat; Ivan Buljo bargá NRK Sámis, muhto ii leat bargan dainna áššiin.

Korte nyheter

  • Sisabahkkemat sámis lassánit

    Norgga olmmošvuoigatvuođaásahus, NIM lea čállán raporta makkár olmmošvuoigatvuođaid leat rihkkun sisabahkkemiin sámiid geavahanguovlluin. Dás boahtá ovdan ahte lea rievdan dan guvlui ahte sámiid beroštumiid guldalit, seammás de NIM-raporta čájeha ahte lassánit dákkár sisabahkkenáššit sámi guovlluin. Dálá rievttálaš suodjaleapmi sisabahkkemiid ja huksemiid vuostá ii leat doarvái buorre, deattuhit dán raporttas, seammás celket gal ahte dat nákce bissehit olu daid ohcamušain maid gohččodit sisabahkkemiid sámiid guovlluide. Dás logat olles raporta (Norgga olmmošvuoigatvuođaásahusa siiddut)

    Vindturbiner i Roan Vindpark på Fosen
    Foto: Dan Robert Larsen / NRK
  • Dokumentára seksuálalaš veahkaválddis

    Guokte sámi nissona muitaleaba "The Silence in Sápmi" filmmas seksuálalaš veahkaválddi birra maid soai leaba vásihan ja go leat geahččalan jávohuhttit sudno. Dokumentárafilmmas muitaleaba Ida Labba Persson ja Marion Anne Mienna Rimpi vásáhusain, ja filbmadahkki lea Liselotte Wajstedt lea geavahan gávcci jagi filmma gárvvistit, mii dál čájehuvvo TIFF doaluin. Loga eambbo dás

    Regissør Liselotte Waistedt.
    Foto: June Grønnvoll Bjørnback / NRK
  • Eai lágit heargevuodjin-NM

    Dán jagi eai šatta Norggameašttirgilvvut heargevuodjimis ja njoarosteamis Romssas, leat lágideaddjit mearridan. Dát doalut galge lágiduvvot guovvamánu viđát ja guđát beivviid, muhto koronaeastadan-njuolggadusaid dihte ja go vurdet konronjoammuma ain lassánit, de eai šatta gilvvut. Dán dieđihit Midnight Sun Marathon vuođđudusas ja Sámiid Valáštallanlihtus, geat jahkásaččat lágidit gilvvuid.

    NM reinkappkjøring 2019, Tromsø
    Foto: Thomas Sirevåg