Hålogalándda lágamánneriekti lea unnidan Guovdageainnu ovddeš várresátnejođiheaddji sex-duomu guvttiin mánuin.
Dán jági álggus dubmehalai son guđá mánu giddagassii go lei rohcošan vuolleáhkásaš nieddažiin. Dál lea Hålogalándda lágamánneriekti luoitán duomu njealjii mánnui.
Lossa mediaberoštupmi unnidii ráŋggáštumi
Guovdageainnu ovddeš várresátnejođiheaddji lei dat vuosttáš gii áššáiduvvui, áššiin mat áiggi mielde guoddigohte nama Guovdageain-rohcošanáššit.
Dilálašvuođat ožžo stuora beroštumi medias, ja lea ge earret eará lossa mediaberoštupmi mii lea dagahan ahte Hålogalándda lágamánneriekti lea luoitán duomu. Maiddái dat ahte ovddeš várresátnejođiheaddji lea massán barggu, poltihkalaš ámmahiid ja saji servodagas lea váikkuhan duomu.
Guoddalii duomu sturrodaga
Ođđajagimánu son dubmehalai guđá mánu giddagassii, go lei guđageardde čađahan sekuálalaš oktavuođa 15 jahkásaš nieiddažiin. Ieš lei 40-jagi. Son máid dubmehalai máksit 50.000 ruvnno niidii. Ovddeš várresátnejođiheaddji dohkkehii duomu duogáža, muhto guoddalii duomu sturrodaga.
Lassin mediaberoštumi, lea maid dat váldon vuhtii ahte seksuálalalaš oktavuohta lei eaktodáhtolaččat, nu ahte ovddeš várresátnejođiheaddji ii bággen, ii ge fillen nieiddaža seksuálalalaš oktavuhtii.