Klemet Amund Eiras lea dálveorohat nuorttabealde Gurbbeža, Kárášjoga gielddas. Dál lea heajos guohtun bohccuide, lohká son.
– Dál ii leat beare ráhpa guohtun. Dat lea jo leamaš beannot mánu - dan rájes go mii leat boahtán, ja guohtun lea heittot, lohká siidadoalli.
Son muitala ahte heajos guohtun barggaha ja badjeláhpiid váibada sin.
– Skohterat galget šurrat 6-8 tiimma, olbmot váibet, ruhtabursa guorrana, bohccot ruoidnagohtet, gal das leat stuorra váikkuhusat, lohká son.
Guovtti johtolagas guohtunroassu
– Dál lea guohtunroassu gaskajohtolagas ja nuortajohtolagas Guovdageainnu suohkanis, muitala Romssa ja Finnmárkku boazodoallohálddahusa direktevra Sunna Pentha.
Lea heahtedustenlávdegoddi mii lea leamaš iskame guohtuma hálddahusa beales.
– Dat lea ipmirduvvon ahte stuora oassi eatnamiin lea dakkár hámis ahte boazu ii beasa guohtut. Dat mielddisbuktá dan ahte jus daid galgá doallat heakkas, de ferte álgit biebmat oalle jođánit, lohká son.
Šiehtadallit leat dál lágidan heahtedustenvuogádaga, siiddat ja orohagat besset geavahit iežaset heahtefoanddaid, jus dat ii oro doarvái, de sáhttá ohcat stuorit foanddas ruđa.
– Dál lea celkon ahte daid doaibmabijuid, maid mii evttohit, lea álgit biebmat ja sirdit ealuid lagabui biilaluotta, vai ii leat nu guhkki geasehit fuođđariid. Mii leat ávžžuhan siiddaid ohcat dispenšuvnna guohtunáiggiide, vai besset geavahit čakča, giđđa dahje geasseeatnamiid go áigot biebmat ealuid, muitala Pentha.
Gaskavahku lea heahtegearggusvuođalávdegoddi vuolgime fas iskat guovlluid gos lea heajos guohtun.
– Dilli lea duođalaš
Norgga Boazosápmelaččaid searvvi (NBR) konstituerejuvvon jođiheaddji Inge Even Danielsen muitala iežaset leat gullan ahte muhtin báikkiin lea heajos guohtun.
– Midjiide dieđihedje árračavčča ahte guohtun lea hedjoneamen. Muhtin siiddain lea duođalaš dillii. Sullii 50 % guohtuneatnamiin leat bodneskárta ja dat mearkkaša ahte boazu ii olat eatnamii, lohká son.
– Mii galgat loahpageahčen vahku čoahkkinastit Stádahálddašeddjiin gullan dihte mo manná ja maid viidáseappot bargat, muitala Danielsen.
Jahkásaččat šiehtadallá NBR stáhtain. Šiehtadallamiin várrejit earret eará ruđa nuppe jahkái. Danielsen diehtá dál jo maid áigot deattuhit.
– Boahtte jagi šiehtadallamiin áigut bidjat deattu boahttevaš guohtunroasuide, muitala son.
Maiddái Ruoŧa beale Sámis lea heajos guohtun. Norrbottenis leat 20 čearu ohcan heahtedoarjaga Ruoŧa Sámedikkis go ii leat guohtun. Muoná čearru lea okta dain, mii lea ohcan doarjaga.
– Lea olu bargu dál, eallu ruvgala duohkut deike, ja mii geahččalit doalahit ealu čoahkis, muitala Hans Holma, Muoná čearu ságadoalli SVT Sápmái.
Bures / Hei
Leago dus juoga váimmus ja háliidat midjiide dan muitalit? De sáddes midjiide e-poasta.
pst, dáppe gávnnat buori sisdoalu.
PÅ NORSK: Har du ris, ros eller tips om hva vi i NRK Sápmi bør se på? Kontakt oss da vel.
Ps. Her finner du godt innhold.