Gumppe fas sis-Finnmárkus
Stáhta Luonddubearráigeahčču lea dieđihan fylkkamánnii ahte boazodoallit Sis-Finnmárkus vuorjašuvvet fas boraspiiriin, čállá Ávvir áviisa. Hans Ole Eira mii siiddastalla Láhpoluobbala nuoratabealde, Hánskke-Niillasa bártniid siiddas lohká iežas vuohttán gumppe go lei ealu birra vuodjime ovdditbeaivvi. Sii leat maid gávdnan ráppi ealo siste. Luottat čájehit ahte gumpe lea jođus Kárášjoga guvlui. Skuohtanjárgga ovdaolmmoš, Mikkel Nils D. Sara, lea gearggus fas jávkadit gumppe iežaset čakčaorohagas. Stáhta luonddubearráigeahčči Magne Aasheim lohka sii navdet dán gumppe boahtán Lulli-Ruoŧas. Dál lea fylkkamánni duohken mearridit addet go lobi báhčit dán gumppe. Gieskat báhččui gumppe Šuoššjávrris go lei speadjan bohccuid ja sávzzaid.