NRK Meny
Normal

Gullogoahtiba maid NRK Sámis

Dál besset Norgga bealde maid gullat lullisámegielat radiotalkshowa Steinfjell & Steinfjell.

Máret ja Inga Marja Steinfjell

Máret ja Inga Marja Steinfjell

Foto: Mattias Ahlm/Sveriges Radio

Ihttin bearjadaga 7.4 sádde NRK Sápmi lullisámegielat radiotalkshowa Steinfjell & Steinfjell radios diibmu 16:30-17:30, maŋŋel Sáhka váibmosis-sáddaga.

– Vuohki oahppat máttasámegiela

NRK Sápmi áigu dás ovddasguvlui sáddet radiotalkshowa bearjadagaid.

– Dát lea dat vuosttaš talkshow sámegillii, ja lea erenoamáš somá go dat lea juste máttasámegillii. Mii leat leamaš hui gitta das ahte juohke sámegiella lea čadnon sierra sáddenáiggiide ja prográmmaide. Dál mii geahččalat sáddet dán máttasámegielat talkshowa dan áiggis go mis láve leat davvisámegielat guoimmuheapmi. Dát lea maid vuohki oažžut min geat eat hálddaš máttasámegiela oahpásnuvvat máttasámegillii, lohká NRK Sámi rádio- ja dokumentáradoaimmahushoavda Per Inge A. Åsen.

Maiddái Yle Sápmi sádde dán radiotalkshowa bearjadagaid diibmu 16 Suoma áigge.

– Dáidá áigi fas čavggahit oappá

Ihttin lea Máret Steinfjell ja Inga Márjá Steinfjell goalmmát prográmma. Steinfjell & Steinfjell sáddejuvvo njuolga SR Sámi radios diibmu 15:00-16:00. Prográmmas láveba hupmat vahku dáhpáhusaid birra.

– Nubbi munnos ii dieđe maid nubbi lea plánen sáddagii. Lávke studioi ja ferte leat gearggus dustet nuppi ságaid. Geahččalanprográmmain lei sporta nuppi surgehit ja hehppehit. Letne measta ilá siivut leamaš vuosttaš prográmmain, dáidá áigi fas čavggahit oappá, reašká Inga Márjá Steinfjell, gean mielas lea hui somá go talkshowa gullogoahtá maid NRK Sámis.

Vuosttaš geardde go Steinfjell & Steinfjell sáddejuvvui lei sámi kulturbeivviid Lopme Naestie lágideamis Bienjedaelies Ruoŧas njukčamánu 18. beaivvi.

Nubbe prográmma gullui cuoŋománu 1. beaivvi.

Dát guokte vuosttaš prográmma eai šatta sáddejuvvot NRK Sámis, muhto daid sáhttá neahttaradios gullat dás: