46 jahkásaš Kari Bianca Nyby, gii ássá Soggovuonas Porsáŋggus, bargá buohccidivššárin ja smávvadálolažžan. Iežas friddjaáiggis son doaibmá dálkkodeaddjin ja son máhttá maid bidjat olggos vuoiŋŋaid mat ráfehuhttet olbmuid. Dasa son oažžu veahkki sis geat leat vádjolan eret ja ellet nuppe bealde.
Muittut báidnet viesu
Muittut olbmo maŋis, gii lea vádjolan eret, sáhttet dagahit ahte maŋisboahtti gaskkohagaid dovdá ahte son ii leat okto viesus ja dovdá ahte dieppe lea gii nu guhte oaidná ja čuovvu mielde das maid son bargá.
Muhtumin sáhttá maid gullat olbmo vázzimin viesus vaikko ii han doppe leat giige eará. Diekkár dilis olmmoš dovdá iežas álo váibbas, son dovdá ahte ii goassige beasa doarvái guhkká nohkkat, lohká Kari Bianca.
Siellu eallá viidáset
Dán girjjis čállá Ingjerd Tjelle earret eará Kari Bianca Nyby birra
Foto: Arne Ivar Johnsen / NrkGo olmmoš jápmá de lea sávvamis ahte olbmo siellu manná dohko gos lea čuovgat go doppe gávdná siellu ráfi. Sii sáhttet liikká máhccat min lusa dainna ulbmilin ahte fáktet ja áimmahuššat min, lohká Kari Bianca.
Muhtumin gal geavvá nu ahte siellu manná dohko gos lea seavdnjat ja jos nu šaddá de máhccá siellu ruovttoluotta dohko gos olmmoš lea orrun dan botta go lea eallán dán máilmmis. Doppe de siellu ohcá čuovgga, fámu, ja dat sáhttá de ráfehuhttit olles viesu, lohká Kari Bianca.
Ii dárbbaš ballat
Olmmoš ii dárbbaš jápmimis ballat oainnat go olmmoš guođđá dán máilmmi de lea okta gii veahkeha olbmo sielu nuppe beallai, dohko čuvgesvuhtii. Nuppe bealde, doppe gos lea čuovgat, doppe han vurdet min oahppásat ja fuolkkit min.
Kari Bianca Nyby, gii bargá buohccidivššárin Porsáŋggus, lohká oaidnit dakkár guhkes olmmoš lágániid lánjas gos olmmoš lea guođđimin dán máilmmi. Sii eai leat guđege láhkai váralačča, sis lea ollu ráhkisvuohta ja sii váldet de jápmán olbmo sielu ja dolvot dan, muhto gosa dan dolvot, dan gal Kari Bianca Nyby ii dieđe.
