Dáin márkaniin lea guhkes historjá. 1800-logus lávejedje gitta Kárášjogas boahtit gávppošit márkaniin, muitala historihkkár Aage Solbakk.
Dološ márkanat
Historihkkár Aage Solbakk
Foto: Nils John Porsanger/NRK– Maid olggut vuonas bohte deike ja dat lei duođai stuora márkanbáiki. Go geaidnu bođii, de rivde olbmuid gávppošandábit ja 70-80 jahkái ii dáhpáhuvvan dáppe nu olu. Muhto 1992 rájes lea fas lágiduvvon juohke jagi ja lea menestuvvan hui bures, muitala Solbakk.
– Dáppe leat hirbmat olu olbmot, ja sii bohtet juohke sajis.
Guhkesnjárggamárkaniin lea eanaš gávppošeapmi, muhto doppe lea maid ovttastallan dehálaš.
– Olbmot besset dáppe deaivvadit ja háleštit. Olbmot geat leat boahtán geasseluomus ruovttubáikái besset deaivat oahpes olbmuid. Dien láhkai lea maid dát márkka hui buorre.
Almmuhii báikenammagirjji
Solbakk almmuhii maid márkaniin ođđa girjji, "Báikenamat Sámis, oassi 2", mas leat báikenamat Deanus, dáin guovlluin: Deanodat, Horbmá-Hedeguohppi, Geavgŋoaivi-Sirbmá-Bievrrá.
Son lea maid geahččalan čilget báikenamaid duogáža maid girjjis.
Geahča video márkaniin bajemusas artihkkalis.
