NRK Meny
Normal

Gufihtarlonuhussan gohčodii eadni su

63- jahkásaš Per Utsis lei eallima vuosttaš jahkebealis hui váttis dilli. Váilevaš dikšu ja borramuš dagahii ahte mánná oaččui duođalaš vuoiŋŋašvigi, ja gosii jámii. Nu bođii ovdan preassakonfereanssas gos girji "Gutten ingen ville ha" almmuhuvvui Oslos.

Per Utsi

Per Utsi, biebmoeadni Lotte Øiestad ja oabbábealli

Foto: Heaika Skum / NRK

Eadnái lei báhcán dakkár ipmárdus ahte Piera lei ulddaid mánná, ja ahte so danin ii ánssášan eallit. Dát dagahii ahte go Piera lei mánnosaš, de son ii ožžon eatnis albma borramuša ja mielkki. Áidna maid Piera oaččui lei čáhci.

Inga gájui bártnáža

Per Christian Øiestad, muitala ahte ránnjá áhku, Inga dat gájui Piera heakka, danin go son golbmii váhkus doalvvui sihke mielkki ja borramuša dan lávvui gos Piera lei.

Riŋgii politiijaide

Gutten ingen ville ha

Dá lea girji Per Utsi birra, man Trude Trønnes lea čállán.

Foto: Z-forlag

Per Christian Øiestad muitala ahte Ránnjááhku máŋgga geardde riŋgii leansmánnái, muhto ii mihkkege dáhpáhuvvan. Lagabui juovllaid Inga válddii oktavuođa politiijameasttirin Čáhcesullos, go oaivvildii ahte dilli lei vearáskan. Øiestad muitala ahte easka ođđajagimánus bođii dearvvašvuođadivššár iskat máná.

– Dan maid dearvvašvuođadivššár gávnnai lei unna mánáš beare smávva gietkamis. Go son oinnii máná gietkamis, son doaivvui ahte mánná lei juo jápmán, muitala Per Christian Øiestad.

Øiestad muitala ahte mánná lei ovcci mánu divššus buohcciviesuin. Dat mii lea mearkkašahttin lea ahte dain buohcciviesuin ii gávdno buohccijournála mas sáhtášii oaidnit movt máná dilli dalle lei, ja makkár divššu mánná lea ožžon, dadjá biepmoáhčči Per Christian Øiestad.

Bođii Betaniai Álttás

Váile beannotjahkásažžan bođii Piera Alma Halse divššu vuollái Betanias Álttás. Dalle Inga giittii ipmila, ja logai ahte viimmát oažžu dát mánnáriehpu albma divššu. Muhto ii dilli gal lean nu buorre doppege, danin go girjjis boahtá ovdan, Betanias Piera vásihii seksuálalaš illastemiid.

Advokáhtta čállán girjji

Girječálli, Trude Trønnes, bargá beaivválaččat advokáhttan ja lohka iežas ollu bargan mánáidáššiiguin, ja das son oinnii movt girjji bakte sáhtii muitalit máná vásáhusaid 50-logu rájes gitta 70-logu rádjai. Muitalusas govviduvvo makkár riektedilli mánás lei dan áiggi servodagas, ja movt dalá servodat áimmahušai mánáid.

Per Utsi, gean birra dát muitalus lea, lei mánná gii lei hui hearkkes dilis, ja son sámi mánáidruovttu mánnán lei dalle buot vuolimusas árvovuogádagas. Dat gal bures ja čielgasit ovdanboahtá máná muitalusas man Trude Trønnes lea čállán.

Deaivvadit fápmovugádagain

Trude Trønnes

Advokáhtta ja girječálli, Trude Trønnes lea ollu bargan mánáidáššiiguin advokáhttan.

Foto: Heaika Skum / NRK

Trude Trønnes lohka girjji áigeguovdilin dál odnege, danin go dat guoskkaha oppalaš čuolbmabeliid, ovdamearkka dihte dan go dát unna olmmoš deaivvada fápmovuogádagain, servodatvuogádagain ja makkár saddji olbmos lea servodatsajádagas.

– Vaikko makkár vuogádagaid de ráhkadivččii, de dat vuogádagat eai šatta buorebun go dat fápmoolbmuid geat leat njunnošis ja daid galget hálddašit. Nu dadjá Trude Trønnes, ja lasiha ahte dánin áiggis áigái dárbbašuvvojit sihke gozihaneiseválddit ja sihkkarastinvuogádagat.

Lea Z-girjelágádus, guhte almmuha dán girjji. Lágádusa hoavda, PerChristian Øiested, lohka ahte váddáseamos lei gávdnat girječálli. Muhto sii válljejeddje Trude Trønnes, ja leat huiduhtavačča.

Dál son lea beakkálmas

Per Utsi

Per Utsi čálii dearvvuođaid girjeostiide geat set girjji su muitalusain Oslos mánnodat maŋŋelsgaskabeaivvi.

Foto: Heaika Skum / NRK

Per Utsi gal logai iežas hui ilus girjjiin, ja čálii dearvvuođaid girjeosttiide maŋŋil preassakonfereanssa.

– Dál lean mun beakkálmas, go dát han lea girji mu birra, dadjá Per Utsi.

Ieš ii loga maidege muitit dan áiggis go son lei Kárášjogas, go son han dušše lei unnámánáš dalle. Utsi lohka fitnán Kárášjogas dalle go su váhnemat hávdáduvvuiga. Muhto Kárášjohka lei sutnje amas báiki, dadjá Utsi.

Ovdáneapmi buori guvlui

Trude Trønnes lohká girjji bakte lohkki sáhttá čuovvut man ládje olmmošoaidnu lea rievdan 50-logus rájes gitta 70-logu sisa. Dát mii dás lea buorre, lea ahte ovdáneapmi lea rievdan buori guvlui, dadjá Trønnes.

Muitalus maiddái čájeha movt okta olmmoš, dahje nu movt dán muitalusas, okta bearaš sáhttá váikkuhit ovtta máná dili buoret guvlui.

Áviisa VG, mii lea nášunála tabloidaáviisa lea mannan vahkkoloahpa čállán stuorra 9-siidusas reportaša Per Utsi eallima birra.