Sámi Music Awards lágiduvvo Álttás Guovvamánu 5. beaivve, oassin Sámi musihkka vahkkus. Dalle galget sámi musihkkárat gudnejahttojuvvot, ja doalut galggaše speadjalastit sámi musihka olgomáilbmái.
Doarjja
Klemet Anders Buljo muitala ahte sii gulahallet Music Norway ja FolkOrg organisašuvnnaiguin, vejolaš ovttasbarggu birra. Sámi Music Awards doalut leat ožžon doarjaga Kulturráđis.
Ruoŧa Sámediggi doarju sihke Sámi musihkka vahkku ja Sámi Music Awards doaluid, ja dáinna lea son duđavaš.
– Dat lea midjiide hui buorre signála, ahte sii dorjot.
Lágideaddji niehku
Mis lea jo Sámi Grand Prix, lea go dárbu Sápmi Music Awards doaluide?
– Sámi Grand Prix dieđusge lokte ođđa taleanttaid, muhto mii háliidit muitalit ahte sámi musihkka lea eanet go dušše SGP, dat lea eanet go dat mii gullo rádios, dadjá Buljo.
Buljo maiddái namuha ahte sin niehku lea ahte Sápmi Music Awards šaddá deaivvadanbáiki sámi musihkkariidda ja sámi musihkkasuorgái, gos musihkkarat oktii jagis čoahkkanit.
– Mii eai leat ovttasge dan mađe resursat ahte mii sáhttit okto juohkehaš olahit máilbmái. Go mii mannat oktii, de mun jahkán mii olahit dobbelii.
Eŋgelas namma?
Sivvan manne doalut leat eŋgelasgillii nammasuvvan, lea márkanfievrrideapmi.
– Dat lea dieđusge hui stuora oassi márkanfievrrideamis sámi musihkkariid olgomáilbmái, čilge Buljo.
Eaige sii leat jurddahan lonuhit sámi nammii.
– Mii leat hupman olu dan birra, makkár namma galgá leat. Dađi eanet mii leat bargan dáinna, dađi eanet riekta orro Sápmi Music Awards.
Boahtteáigi
Mo šaddet doalut boahtte áiggis?
Dat doalut galggaše juohke jagi guđat vahkkus, guovvamánus. Earret go 2017:is, dalle lea Tråante2017, loahpaha Buljo.
