Guatemalas lea várri fas russugoahtán dolaid. Unnimusat leat 75 olbmo duššan. Dáin leat olu mánát. Ja lagabui 200 olbmo leat ain jávkosis.
Eiseválddit lea fárreheamen eret olbmuid Vulcano de Fuegu vári lahka. Giláš El Rodeo mii lea 44 km eret oaivegávpogis lea šaddan lává vuollái. Dán eamiálbmotguovllus ásset birrasiid 14.000 olbmo.
Čuohcá sápmelaččaide
Sámeráđđi jođihii nuppelot jagi dás ovdal veahkkeprošeavtta Guatemalas. Okta dain bargguin lei veahkehit earret eará Yepocapa-gávpoga skuvllaid.
Elise Valkeapää barggai doppe moadde jagi ja dovdá bures guovllu.
– Gal dat lei váivi gullat go fas bođii diekkár dáhpáhus Guatemalai. Diet vulkána, dollavárri, Vulcano de Fuego lea lahka Yepocapa ja Chimaltenango gos mun lean orron.
Valkeapää muitala ahte dát roassu guoská maid sápmelaččaide geain leat fáttarmánát doppe.
– Mis leat hui ollu sápmelaččat geat dorjot mánáid, geat mannet skuvllain ja mun in dieđe mo lea mannan daid bearrašiiguin ja mánáiguin Yepocapas. Dál leat Guatemalas njealji gielddas gidden buot skuvllaid, Valkeapää muitala Nrk:ii.
Guatemala presideanta Jimmy Morales lea almmuhan morašáiggi ja guvlui heahtedili.