Mearrasápmelaš Hadi Strømmen Lile, Álttás eret, lea nammaduvvon ođđa áššedovdin «Gáju mánáid» searvái (Redd Barna) mas leat kántuvrrat miehtá máilmmi.
Lile galgá gozihit mo riikkat geavahit ON mánáidkonvenšuvnna ja su bargun lea dárkkistit mánáid dili Asias.
«Gáju mánáid» searvvis leat kántuvrrat 120 riikkas.
Hadi Strømmen Lile lea riektesosiologa ja olmmošvuoigatvuođadutki. Vuosárgga álgá son ođđa bargui mas váldo bargun šaddá gozihit čuvvotgo riikkat mánáidkonvenšuvnna.
Lile lea bargan álgoálbmogiid gelbbolašvuođaguovddážis Gáldus Guovdageainnus ja lea moanat jagiid gozihan eamiálbmotmánáid dili.
Doavttergrádabarggustis čalmmustahtii makkár guottut leat Norgga skuvllain sápmelaččaid guovdu ja man unnán Norgga mánát dihtet sápmelaččaid birra. Son lohká alddis lunddolažžan gozihit eamiálbmotmánáid dili.
Hadi Lile lea bargan Pakistanas, gos lea čuvvon mo mánáid barggahit, vaikko dát rihkku ON mánáidkonvenšuvnna.
Dál šaddá su bargun miehtá máilmmi johtit, gulahallat eiseváldiiguin - mo áigot ollášuhttit mánáidvuoigatvuođaid.