Normal

Gonagasreabbát unnit go ovdal

Gonagasreabbát eai leat šat seamma šattolačča go ovdal, čájeha dutkanraporta.

Kongekrabbe
Foto: Anette Karlsen, Havforskningsinstituttet

Jus dálá bivdu joatkašuvvá, de boahtte áiggis ii šat gánnit bivdit gonagasreabbá. Dan čájehit dutkamušat, mat leat čađahuvvon maŋimuš logi jagis. Dutkanboađus ii hirpmástuhte Unjárgga reabbábivdi Odd Lahm.

- Dat orru leamen nu, ahte dutkit leat dien áššis riektadis. Reabbát šaddet smávit ja smávit, maid sii bivdet dál. Dalle go sii álge bivdit dáid, de eai olus váldánge vuollil viđa kilosaš reabbáid. Dál sii fertejit váldit gaskal guovtti ja golmma kilosaš reabbáid,čilge Odd Lahm.

- Varrásat bivdojuvvon menddo olu


Romssa Mearradutkaninstituhta dutki Ann Merete Hjelset dat lea dutkan reabbáid logi jagi Várjjatvuonas, Deanuvuonas ja Lágesvuonas. Doavttir-nákkosgirjjistis son duođašta, ahte dán áigodagas leat bivdojuvvon menddo ollu stuorra varris reabbát.

Ann Merete Hjelset

- Deanuvuonás sáhttá bivdu rievdat oalle jođánit heajut guvlui, muitala dutki Ann Merete Hjelset.

Foto: Ivar Grydeland / NRK

Dát fas čuohcá gođđamii, go njiŋŋálasat dárbbašit suodjalusa stuorra varis reabbáin jus galget bállet gođđat. Ovdal njiŋŋálasreabbá gaskamearalaččat sáhtii gođđat viđa geardde iežas eallimis, dál dát dahkko beannot gardde.

Stuorra váikkuhusat bivdui


Go gonagasreabbá ii leat šat seamma šattolaš go ovdal, de dutki jáhkká reabbábivddu njulgestaga guoráiduvvat muhtun vuonain áiggi mielde.
Dát lea fuones ođas guolásteddjiide, oaivvilda Odd Lahm.

- Dát lea dehálaš dienas sidjiide, geain lea fatnasat ja reabbábivdo earit.

GULDAL: